頹廢假期

尋日終於放我四十幾日嚟第一日假，由於之前果晚睇完戲，再加上返到屋企煲下碟睇下書，咁就搞到成三點幾先訓，最後果日我訓到下午一點先起身。一起身望到個鐘，仲習慣性諗：「仆街，遲到！」。再等我清醒幾秒後先諗返起今日係假期，而且唔係放假的話，未到八點，老頂就會打嚟問候我，所以更確信呢一日係day off！

一起身，唔駛諗就係沖個靚涼再食個晏，而充滿惰性嘅我當然係點我細佬去買埋比我食。到醫飽個肚後就開始我頹廢嘅一日，原先日前係計劃約人行下街飲下野咁，到即日我發覺自己四十幾日嘅疲勞隨之爆發，跟住就索性唔出街匿埋屋企度。望住部電腦坐左一陣就已經諗唔到做咩好，果一刻突然間好鬼空虛，又諗：「如果我唔放假死撐可以撐到幾多日呢？我會唔會做到死？」。再諗多陣：「早知唔放假，放假又唔係出去癲下，好似同無放假一樣，只係變左坐喺屋企硬膠膠。」諗完呢堆野之後，成個人比之前更空虛，個人都唔知飄左去邊，一邊諗下呢樣諗下果樣，又一邊係度睇書。

到夜晚，情緒更起伏不定，唔知點解又諗到好多無謂野，仲要係我好唔想諗起果堆，慢慢開始出現幻想幻覺，木口木面咁過。直至到訓前我都以呢種思覺失調嘅狀態去過。呢一日放假除左身體上係叫休息左之外，精神上仍然飽受煎熬，早知係咁，我就唔放假啦！