色 | 戒

警告：內含劇透

終於今日睇左色戒，由好早未宣傳時已經話第一日要去睇，但最後都因為工事忙碌而拖到今日先睇。不過各位，唔好意思啦，我非以獵奇心態去睇，我唔會講各男仕所關心嘅湯唯身材，亦唔會講各女仕關心嘅梁朝偉下體金庫。

成套戲李安都拍得幾實際，你唔會見到藝術片經常出現嘅鏡頭把戲，又或者花巧場面，總之你落足心機睇就應該會明。先講李安，我最主要係因為佢先睇，所以都幾期待。係人都知李安執著，你睇呢套戲時就更能體會到佢想表達出果種完美，唔止對演員同劇本嘅要求，你就咁單單睇佢所有擺設同場景就知佢做左唔知幾多research，歷史背景要知唔難呀，但係佢就細微到每個人係點行點走，點講野，生活習慣都跟到足當時背景，而且場景都真係好似回溯到以前一樣，你會見到有部從未見過嘅舊電車，見到以前尖沙咀海傍，又會見到上海嘅繁華大城市風貌同埋橫街窄巷貧窮一面嘅強烈對比，又會望到成間屋入面好似放滿古董一樣，感覺真係好似由李安拎部時光機帶你去到當年，絕對唔係電視城九流廠景可比，真係齋睇呢part都知佢係好嚴謹認真。性愛場面方面係比我想像中多，我真係相信李安係覺得有需要先拍，各位睇時就會睇得出係不穢不淫，由鏡頭郁頭到梁朝偉與湯唯嘅交纏都係好有美感同動感，加上佢地係交足戲，唔係四仔咁一路死un，兩位都叫表現到果一刻心情同埋想交代嘅一切。不過，如果真係就位就真係辛苦左D啦，十幾廿款唔同體位，仲勁過玩花式，梁朝偉都係男人呀，生理反應實有喎，無格仔真係唔知佢點就啦，好有可能係縛實佢小弟弟，點都好，我都替佢．．．．．弟弟可憐。

以三位主要角色嚟講，梁朝偉係真係做得最好，佢個角色係好演而且最出，但係本身角色心情描述得好複雜，佢又無話要你睇到感動，但就一定記得佢每個表情動作，你會好易投入到佢個角色，最深刻唔係一幕，而係佢慢慢融入湯唯個陷阱（完全相信及愛上佢）嘅變化，我真係信佢話自己演到就精神崩潰。至於湯唯就有少少失望啦，佢真係有些少浮誇，佢由表面到內歛果下收放真係唔夠老成，但係只係期望過高，又或者梁朝偉太搶，基本上佢都真係演得好，最起碼佢演活到個角色。最後就係完全無期待過嘅王力宏，佢就正如我所「期待」一樣，無咩演技，始終佢係演唔慣戲，唔同唱歌呀，做戲真係考起佢啦，好彩佢個角色性格幾襯佢，如果唔咪仲大獲！佢而家已經將「戒」代表善嘅一邊演到邪邪地，感覺好似佢推湯唯落火坑一樣，表情交唔足功課，內心戲亦未夠經驗。

其實當初唔知點解套戲叫色戒，根據外間及王力宏專訪解釋，「色」係代表梁朝偉，「戒」係代表王力宏。到睇完套戲我先知有另一個意思，係咩就自己睇啦，好字面架咋。而色戒兩個字就有如善惡一樣對立，呢種對立關係其實出現好幾次，就好似湯唯最後嘅選擇係代表感性，而梁朝偉最後選擇係代表理性，睇完結局一刻真係幾感觸，我自己係理性，但我係梁朝偉的話，我寧願變成湯唯。

最後個結局其實無咩驚喜，都可以估到，但果一段真係唔可以錯過，淨係睇演技都夠，總之由入珠寶行開始就一定落足精神啦。本應可以有更多野想講，但唔想洩露太多啦，自己去睇啦，看倌們。

面具

路太遠　試試兜圈　望更遠　智慧的開端
沿途或虧損　傷心會遠　心愛需要挑選

若怕痛　試試婉轉　並永記　愛侶鋪的磚
從前是相戀　現在計算
為何明明共聚　問候沒半句　太過心酸

＊曾挽手避開幾多次雨水　仍記得那天掌心印在這裡
　熱情漸褪去　才明瞭全是沒有火花的允許　
若說穿　其實當初不登對　流盡多少的眼淚　
活得幾歲　若必須面對　面具掩飾空虛＊

在這晚　約了一餐 望兩眼　慣性的餐單 然後望清水　靜默以對
為何明明共聚　問候沒半句　太過唏噓
Repeat＊

Wo... 會習慣以一世相許
無論曾避開幾多次雨水　還承認幸福根本不在這裡
任全部過去　來重頭尋覓最愛　讓痴心寄居
若說穿　其實不捨得失去　才學懂分開去睡
活於堡壘　命注定的一對　最後各有所取

近日每日必聽的一首廣東歌，本身我幾鍾意王菀之把聲，都會有留意下有咩新歌。雖然首歌半新不舊，但都仲未聽厭，自己個人又幾鍾意面具呢個topic，可能自己都知自己一直帶住好幾個面具做人，唯一只有傷心一面係留比自己，最想去掩飾，可能好多唔知情嘅人永遠覺得我算係瀟洒，好似好多野好快無事，甚至唔再提，有時仲會扮失憶，其實呢一部份算係自己選擇逃避，同樣帶住一個笑面迎人嘅面具，就算唔笑，但最起碼都唔想比人見到自己個憂鬱樣，我唔係怕人同情，而係無必要要人去承受，甚至共同分享果種氣氛，香港對我嚟講已經係淒涼地，好多人真係有苦自己知，每個人又揹得幾多呀，我真係信香港人十個有七個人有情緒病，得閒留意每個人收工個面口就知啦。

「命注定的一對　最後各有所取」

其實唔係各有所取，只係無法承擔。

邂逅

站在我身前兩步的你，我沒有忘記你的身影。我望著你用手捲起頭髮的動作，整個車廂中都飄著你的洗髮水香味，戴著幼邊眼鏡的你多了幾分嬌柔味道，望著你的精緻面容，我看呆了，我的目光不能離開你的一切，偷看著你看的書，偷看你的目光，偷看你的淺笑。就在我倆同時離開車廂時，大家撞到了，那刻你抬頭看著我的笑容，忘不了，就是這個微笑。

你聽到了嗎？同時同地再見．．．我會笑著等你

M型社會

大家都應該聽過由日本趨勢學家大前研一建立的新名詞「M型社會」，意思從字面去睇大概都會明，主要係指社會極端發展而產生出斷層，在缺乏中產的社會就稱為M型社會。

幾年前，日本經濟陷入崩潰，出現了富者越富、貧者更貧的局面，而原本應有嘅中產階層就變得越嚟越少，喺呢種唔健康嘅發展下，經濟一落千丈，市民生活變得更艱辛，消費力更逐漸下降。到近年，呢個新興名詞活躍於港台兩地，原因同當年日本一樣，唯一不同的是，日台兩地都有大量政策去應對，只剩香港繼續做佢嘅鴕鳥，乜都扮唔知。

不過我今次最主要想講唔係經濟，而係整個社會型態，就好似青少年問題、品格或人際關係等，就好似近年港女與港男嘅鬥爭開始白熱化，大家都以極端態度去力數對方，不論大家係唔係對方所講嘅港男或港女，點都插左先算，係咪社會太自由或互聯網嘅強大而引致自我權力過剩，大家都變得太自私？就連傳媒界都變得愛理不理，繼續鼓吹呢種對立。

到幾個月前，我返過小學母校睇數學比賽，觀戰後我真係啞晒，我雖然最憎讀數，但以前比賽時，最多只會搶得唔夠人快，但一定無錯，亦都無而家D小朋友諗咁鬼耐。到之後就同返以前教過我嘅老師傾下呢個問題，佢都話而家小朋友好難教，一係聰明得滯，一係蠢到連26個英文字母都唔記得(記住係5年班學生)，學校又唔俾搞小班或精英教學，搞到聰明嘅人都要比蠢果堆拖住，最後一拍兩散。聽完之後真係擰晒頭，心諗：「我諗真係唔應該生細路仔。」

其實好難理解點解會有呢種現象，以上都只係少部份例子，大家有時留意下，而家真係好多野只有黑白一樣，灰色就差不多搵唔到，唔好話再有其他顏色啦。就算只係經濟變成M型，都叫有方法救，但而家睇住個香港一年比一年差，真係好難想像數十年後。

雲端的嫦娥

秋風起，月亮圓。又到了最接近嫦娥的一天，可惜天公不造美，將她囚於雲中，就這樣就錯過了最近距離偷窺嫦娥的機會，只能輕嘆一聲「吾與月無緣也！」

由唔知幾多年前就開始，一到中秋就會落雨，唔理幾大或幾細雨，最起碼都叫做難左清晰地望到個大月光，雖然只係圓些少，無話特別吸引，但都要應下節，做下呢D傳統活動，咬住個甜到嘔嘅月餅去昅下個嫦娥。係就係掃興，不過落雨都幾浪漫嘅，仲要涼涼地，總好過熱到中暑。

其實我聽日仲要返工，我根本無出去，而且今年係五年來再次自己一個過，咁就隨佢啦，索性一個人屋企過（屋企真係得我一個！）但最痛苦嘅係，我仲有一星期先有假放，大大話話，已經四十日無休息啦，離我極限仲有廿日，真係有錢都無命享啦。唉，今晚總係特別多氣嘆。

警世廣告

唔知各位有無睇開電視？我自己就無啦，不過就咁岩今日下午嘆緊下午茶時，就望到有個政府宣傳片廣告幾觸動到我。

之前我未睇過呢個廣告，但據朋友所講，呢個廣告係新拍，訊息係叫人唔好超速駕駛。先睇到個廣告，點都唔似政府宣傳片，起碼佢唔係寫晒字幕，有晒標題，係以一個故事短片作為整段宣傳片嘅骨幹。一開首，就見到類似第一身拍緊人嘅短片，影住一個新居入伙嘅女人，而拍片人就係佢老公，廣告短片中兩人都似拍緊劇咁，交足功課有表情有對白，感覺好似日常生活一樣，似係一段溫馨家庭video。之後鏡頭一轉就望到個男人自己望住部電視睇返呢段video，好快旁白應景彈出。

「ｘ先生於ｘ月ｘ日超速駕駛發生車禍，其妻子昏迷之今。」

隨住呢句旁白，標題出晒嚟叫人唔好超速駕駛。當我睇完後，即刻覺得呢個廣告好掂，我直情有些少寒。呢種負面帶出訊息手法雖然唔係第一次用，但係呢個真係好生活化，而且短片就講到明比你聽「如果你愛你身邊所愛，就應該安全駕駛。」只係唔再係呢種沉悶標題或故事。當然你可以話我知你好憎你老婆或女朋友，你甚至想佢死添，但認真諗下，人地都係想話你知「命係得一條，你死你事，唔好累人！」

睇完呢個廣告，我又諗起日前炒果架法拉利，我覺得條友係慘，但真係唔值得可憐，最值得可憐係佢家人。仲要佢之前炒過一次，只係死唔去，咁樣佢都唔識醒，明知炒親大獲，死係應該，執返條命叫好彩，無人叫你揸咁快嘛！佢呢個教訓係大左D，但正好警惕一下各位駕駛人士。

P.S.有呢段廣告嘅朋友，麻煩你Upload一下上youtube再send比我呀。

Paul Potts

近期呢位人兄真係紅爆，連我都比佢把聲吸引到，姑勿論佢個樣，只係計佢把聲都夠晒無瑕可擊。前排佢終於出左碟，都係唱opera。我有位朋友經我推介後再試聽埋就即時買左，我諗我都逃唔過架啦，都係要買埋碟先夠過癮，果日只係唔想再喺HMV買碟先費事買，次次HMV買真係幾貴嘛，之前買薩頂頂隻「萬物生」足足貴十蚊有多，幾乎買十隻就蝕一隻，我荷包唔係咁漲咋。