Fever

又到咗鼻敏感嘅季節，真係唔明點解偏偏係我就遺傳晒家中兩老嘅衰野，有大近視、鼻敏感，仲有胃病。

我幾乎每年到呢個時候，都會寫blog講起自己嘅鼻敏感問題，可能對我而言，呢個真係好大困擾，例如出街一定要有紙巾旁身，以防鼻水噴射及催淚彈攻勢。仲要唔可以聞到強烈香水味，空氣差少少時出街都唔可以出得耐，因為會頭暈。

仲記得試過有幾次比人誤會我係咪喊腫眼，大佬咪玩啦，男人老狗喊腫眼？你估我想咩，我真係控制唔到嘛。

有幾位朋友同我出外時都會醒目地帶多幾包紙巾比我，真係感激呢幾位朋友咁照顧我呢位長期病患者，在下有生之年一定會恩將仇報，呀！唔係，係有恩必報。

PS2 SD Gundam G Generation Spirits

各位高達迷，快拿出你們快封塵的PS2，進入作戰吧！
SD Gundam G Generation Spirits已經推出，亦肯定是PS2中最後一代GG。

雖然多年來都有一直出不同版本，但今次故事只講原著UC，應該吸引唔少元祖高達愛好者。

玩了兩玩，可能太久沒玩這類遊戲，忘了怎上手，經常被秒（有可能是我一開始就玩閃光之凱撒衛的關係（－v－）），不過的確刺激，我感受到熱血了！

99999999 in 1

九千九百九九萬九千九百九九合一，這不是天文數字，而且遊戲合集。（見下圖）



紅白機年代，有好多老翻遊戲，之後老翻商們為左加強吸引力，就於一張盒帶中同捆多款遊戲（很多都是相同，只是名字不一樣(-┌┐-)||l）。

初初都是以8合1，到後來50合1，當年我看到最多都只是500合1，已經覺得十分驚訝，因為我曾經玩過一隻200合1，單單是試試每個遊戲就用了一個下午，而且沒有一隻是認真有玩過，只是確定能玩便換下一隻，就這樣已經能浪費一個下午，你話時間幾唔耐用。

如果你會每隻也試，就當每隻遊戲要用上1分鐘吧，那麼你就需要1億分鐘，1小時有60分鐘，那麼你就要玩1666666小時(小數點後略去)，1天有24小時，那麼你就要玩69444天，1年有365日，那麼你總共就要玩190年。那麼請問你有190歲命嗎？

真的很難想像有誰會玩這隻1億合1，更無法想像是那位天才製造（爆笑！）。

或者，你可以咁諗，當每隻Game要用1蚊開發，咁你就已經擁有1億啦，你已經賺到第一桶金，仲要係一大桶呀！

龍虎相爭

呢排睇開電視的話，都會留意到兩大網絡商「PCCW」及「HKBN」的廣告，廣告內容並非說他們有多快，有多穩定，又或者又幾抵！而係不斷攻擊對手的弱點，你可以話呢種宣傳手法係一種卓頭！

火頭是由「HKBN」那邊先點起，由廣告出街兩星期，「PCCW」仍未作出任何還擊，直至幾日前，才播出一個自稱光纖線能圍繞地球26個圈的廣告，用來嘲諷對手的光纖不夠多，不夠全面。

就在這廣告出街不夠數天的今天，「HKBN」又在免費報章頭條日報登一全版廣告（詳見下圖）反擊，內容是講圍繞地球26個圈的光纖線如鋪在香港就等於每條街都有523條光纖線，之後再笑對手的寬頻何解仍用電話線，D光纖係咪鋪晒落地底等．．．

好明顯這次「HKBN」的反擊有點倉卒，其對手「PCCW」的強勢在於連往外地的速度，所以圍繞地球26圈是指鋪在全世界的光纖，這是可以肯定的，但「HKBN」善用了這點去誤導部份無知市民，但「可能佢D光纖鋪晒响地底」呢樣就有被人反駁或借題發揮的機會，因為光纖唔鋪於地底唔通掛上天咩？「HKBN」嘅線唔係鋪晒地底咩？可能佢係想串對手嘅線無直接入屋，但用意錯左。

不過如果佢串得明顯的話，笑點同幽默感會無左，而且亦缺乏左一個誤導成份。之後「PCCW」更可能反擊說明自己有Fiberhome，而且比「HKBN」平，咁就棋差一著。

其實呢類型廣告好識利用廣大市民的無知，包括什麼電話線寬頻，什麼光纖入屋等。

１．香港大部份寬頻用戶用的是CAT5銅線，唔係電話線，更唔係光纖。

２．光纖入屋你估人人都得咩，同埋根本同小市民無關，因為玩Fiber平極都要五百幾蚊一個月，仲未計其他雜費。

３．而家兩家大網絡商比較平嘅月費同而家所宣傳的技術是不同性質，大家都係鬥誤導，再話比人聽快，你細心諗下1000Mb有咩用？仲要＄2xxx幾蚊一個月。

呢類創意廣告有時係幾好笑，如果你理解廣告原理就更好笑，不過而家呢兩間網絡商真係唔知鬥到幾時，始終玩得多都會厭，將d宣傳費慳嚟益下小市民仲好啦。



圖片來源:高登網友「廟細燈籠大」

Blog u!

近日唔知點解有意摺埋個blog，真係連我都唔知點解，自己又唔係無野想寫，而且都好習慣自己有個blog。

雖然呢度人流係少，都只怪小弟文筆粗俗，未見細緻，而且頗為沉悶所致。但想到仍有小量觀眾的這刻，頓時打消念頭。

其實，呢度人少，有時都怪自己寫野飄忽，一時寫下呢樣，得閒又寫下其他九唔搭八野，從來無為呢個blog帶嚟主題，甚至我會同人講：「我個blog就係乜都有，乜都寫，主題就係大雜燴！」

近月都開始改變寫法，少左寫好多應該無乜人明嘅散文，寫野分段叫做參考過唔少blogger，唔想再好似太正經，太作文咁款。要我幽默？睇心情啦，我幽默多用在語言，而非文字，但要我唔再寫到好似論文咁都還可以。（可能係時候加入大量文字暴力、粗言穢語、他媽你的、色慾淫故、馬檻指南、四仔推薦等等）

再早之前，有諗過開另一個專題blog，亦想搵人幫手寫，題材以音樂、電影及書籍簡評討論為主，唔知有無人想幫手開一個咁嘅blog，一齊寫？

不能解的秘密

買左隻「不能說的秘密」，但一直未睇，到今日悶到發瘟時終於開左光，睇完之後，就好想知其他人嘅影評，咁就遊走各大討論區睇下之前d人有咩評論。

遊走完後，就發現左呢個世界原來咁多人睇戲係唔用腦，又唔俾精神去睇就話套戲好多不明反駁位。（以下有劇透）

首先有人問點解第二女主角晴依點解於鬥琴時會見到小雨，喂！人地都講明時光穿梭後，小雨第一眼見到嘅人先會見到小雨，其他人係望唔到，所以果日湘倫都只見到晴依，在結局前亦有影像說明果日湘倫望到晴依在自言自語。

之後又有人問點解湘倫張紙條會交到晴依手上，就因為果日只有湘倫見到小雨，而小雨坐喺晴依後面，紙仔傳到晴依手時，因為佢見唔到小雨，所以就以為張紙條係俾佢，而打開紙條時亦無影住係邊個打開，只係見到對手打開紙條，所以係無反駁。

到湘倫同小雨去小雨家時，究竟小雨家中望出窗外嘅人係咪佢阿媽？唔該各位自己睇多次碟，果個人係1999年嘅小雨，當時小雨係未死，因為故事中嘅時間觀係平行世界，當時廿年前嘅小雨係未死。同樣地，湘倫見小雨失蹤後去佢屋企搵佢時，望出窗那個視點係99年嘅小雨視點。

又有人問何解會證明到係平行世界？因為小雨於畢業禮後回到課室含淚寫塗改液示愛時，當時廿年後的湘倫正好回去課室找已經回到過去的小雨，當時的世界是平行同步，所以小雨係唔知湘倫嘅回應就死去（好多觀眾以為小雨呢個時候係鬼，真係＠＄！（＄）。

結局中，湘倫回到過去係幾時？你可以從小雨的陌生感看出湘倫是回到小雨拿到琴譜前（琴譜說明是有寫彈速會影響到跳躍時間，所以每次小雨的彈速是一樣，目的是去到廿年後），而因為廿年後的琴已被滅，所以99年的湘倫已經不再存在，在過去中所有人都能看到他，他亦能於當時畢業，成為79年的人。

真係唔明點解而家d人未認真睇完就話有反駁，無可否認，套戲背景有少少似「愛在遙遠的附近」，又或者係「觸不到的戀人」，但反駁位我暫時未搵到啦，各位，大可以當呢篇係消毒文，反正我只係話緊而家d人都唔知點睇戲嘅，乜都反一餐，希望「你」唔好對號入座。

由無到有

這個世界真的很神奇，你可能覺得一切都是理所當然，但細心想想，你每日望見的一切絕非表面般簡單，就拿人類來說，每天你都會看到數百位陌生人在身邊擦過，每張臉都不同，每個人都有其獨特的性格及身體特徵。是否每個人在母親胎盤時，就已定了將來的一切？這又的確不是，但就已決定了他的生命，將來的在成長期中的變數是無限的，無法推測，這個雖只是一個生命誕生到成長，再到死亡的過程，但包含的不只是表面看到的演變，還附有所有一切可能性。

在多個世紀前，醫學及科技都不先進，人就只靠先人留下來的知識，知道性交會有機會懷孕，懷孕就有機會生出下一代，逐步繁衍。但他們不會真真正正知道這是什麼一回事？這時，人不是沒有求知慾，但當時文化影響以及神話的思想洗滌，大家都覺得這些都是理所當然。

哲學家說：「每件物品都會有其開始。」這個是不難理解，不論多微少的生命都不會無中生有，它或牠都是由一樣物質演化成一個新的生命體，這個是一個很短的演化過程，就有如人的精子與卵子結合，經過十個月會變成一個新生命一樣。

以上所說的很易理解，是學生課本都能找到的知識，但要去考究更宏大的就比較難，應該說：「這些都是在虛無中。」虛無並非說它不存在，而是在不理解的領域中，例如在近代中，人知道了有宇宙，宇宙被推論成由宇宙大爆炸造成，而大爆坊的成因是先由夸克和膠子組成了質子和中子，之後隨著膨漲及溫度冷卻，有部份質子及中子變成原子核，從而發生大霹靂核合成，這些能量就形成了宇宙（在下在書中所學，解釋得不太好）。雖然這些新發現令人類更接近原始，更接近虛無，但同時，你可能會想，那麼夸克和膠子是那裡來的？如果說他是無中生有，那麼就推翻了「每件物品都會有其開始」。其實這些就是我們的未知領域，組成夸克和膠子就是未知的能量。

曾經有不少人想去推翻宇宙大爆炸這理論，雖然理論是普遍受到哲學家所認同，但仍然有不少人認為有更多其他可能性，原因可能就是因為還沒有真正找到源頭，佛學家更認為大霹靂並不存在。由於因果律的連續性，宇宙為「過去無始，未來無終。」「引力奇點」不會憑空產生，而爆炸背後必有「因」。（來自wiki）

當牽涉到大宇宙，一切就會變得複雜。在我們的地球上，望上夜空，會有無數繁星，星星是燦爛，亦很浪漫，但我們肉眼看到只是表面，在一切都被認為理所當然的情況下，我們真的只能理所當然地活著，理所當然地覺得一切是由無到有嗎？小孩時的好奇心去了那裡？

由好早前，自己就喜歡一切哲學話題，我相信自己是很有好奇心的人，可能是因為自己還是像小孩一樣幼稚，但每次看到自己，就發現這些幼稚真的很微妙。