宵夜

我自小就有吃宵夜這壞習慣，我很容易餓，餓太久就會胃痛，所以很定時每幾小時就吃一次東西。而今晚的宵夜是瑤砫節瓜煲豬碾湯，這個也是明天要喝的，我的家習慣了早一晚或一朝早就煲好明火靚湯，不論是誰煲也好，這個都是習慣。


（手機圖片，質素偏低）

這個湯是我的最愛（中湯），我很愛吃煲湯後的節瓜，加上瑤砫後，湯很甜很清，雖然用豬碾比較貴，但不肥膩，煲好後口感也好，不會太硬，也會太軟身。

平常家人也最常煲這個，因為知道我可以灌下最少八碗，而今次自己煲的份量也蠻多的，早預備來作為這一夜的宵夜。

海的味道(北海道篇)

遊日本大家都很喜歡購物，但我每次旅行的最愛仍然是吃喝及攝影，到別人的地方最好還是先感受當地文化，食物就是了解不同文化的入門篇，所以上年到北海道時，我幾乎吃盡所有美食，吃最多的當然又是海鮮！

為了吃好海鮮，都避免了在餐廳點吃，直接了去了漁市場選購，到步後，雖然那裡不及想像般大，但勝在種類夠多，而且都是新鮮的，不過價錢是有點貴，買了一隻長腳蟹就用了18000日圓，之後再買了鮑魚及些少帶子，總共用了25000日圓（哈哈，但付錢不是我）。之後就在那裡的餐廳點了火鍋，目的是為了生吃外，都希望可以吃煮熟後的味道。海鮮都切好放了上檯，我就急不及待伸手拿了隻蟹腳，撕開了蟹腳的肉，還沒放進口就聞到了一陣海水味，再放到口中時，海水味更濃烈，但頓然又感到失望，首先，雖然肉很多，口感亦一流，但放進口中有點不像吃蟹，蟹的鮮味不明顯，鮮的只是海水，我起初懷疑自己味覺有點問題，所以之後就將蟹放到鍋中熟食，大約等了一分鐘左右，蟹很快已經熟，肉身都變雪白了，這時再次去拿起一隻蟹腳放到口中，果然，生食不及熟食好，煮熟後的蟹味很鮮，肉身爽口而且帶甜，我懷疑生吃時，海水味都太濃，是吃不到這種鮮，最後我就將所有蟹都熟食，雖然是有點浪費，但我想吃更好的。

除了吃蟹外，當然還有帶子及鮑魚，其實由吃蟹時就已經知道，其他海鮮都是除了新鮮外，應該都沒太大分別，不過當我吃帶子後就反駁了自己一下，這些北海道出產的帶子都極度鮮甜，生吃時，海水味的咸都不能掩蓋其甜味，食後的甜味在口中留有餘韻，雖然不持久，但在這短短的時間中，口中都是充滿鮮甜，而我最後當然是再買再吃，始終機會不多，香港又吃不到。

在日本這段時間，除了吃海鮮外，還有吃了和牛、北海道的拉麵及不少小吃，有機會下次再寫一篇。

美食節巡遊

其實小弟我都係第二次去美食節，不過今年就靠工作關係入去，唔駛排隊唔駛迫唔駛錢，如果唔咪又要中會展嘅迷宮詭計。

去美食節，大家都係為左買平野試下新野，但我就無乜目的，可能都係去感受下，睇下眾生相，有野要就買，都唔會諗住掃貨咁掃。不過唔知係咪仍然唔習慣去迫嘅地方，行極都唔多聚財咁款，無咩心機去睇野，莫講話去排隊試食，單單望見條人龍，就想逐個去訪問下佢地係咪未食飯，點解排完又排，食完又食？雖然無目標，但即食物品應該最吸引我，主要係麵食之類，睇下有無新款，有無咩特別平，所以最後都只係買左些少迷你版出前一丁，可惜我應該唔會點食，主要原因係無原味，竟然唔出最經典嘅麻油原味！其他野最吸引可能就係檻欖油，可能自己越大越健康嘅關係，同埋有時煮西餐無咩理由仲用植物油，食出陣味都怪怪地，而且真係比外面平唔少，但當我想比錢時，我先發覺無點帶錢，我真係！＃＠！＄）＄！

買唔到野，更無咩心機想行，唯有兜多幾個轉，行左個零鐘就走人。過多幾日，又到電腦節，到時又去走兩轉，又去望下d相機佬不停影女，而我，就去望下d相機佬點去高抄低抄啦，你影人，人影你，呢個角度特別好笑。

海的味道(下)

其實海鮮中除左蠔呢樣極品外，好食嘅海鮮種類仲有好多，不過唔提啦，要講都有排講，有機會講日本菜會先講講魚類刺生。但蠔以外嘅最愛都係有嘅，佢就係法國玫瑰蟹，外間俗稱為訓覺蟹。呢類蟹係因為佢地懶，唔多郁動，所以先有呢個名，亦因為如此，佢地體內藏有大量蟹膏，甚至比大閘蟹的膏更多，而佢地嘅膏係有分紅色同白色，點解會咁？我就無詳細問過啦，但兩種我都食過，食法都係以凍食，我係比較偏好白膏嘅。

如果要形容佢地嘅白膏，只可以用棉花糖去形容，入口即溶而且香口，帶有好淡淡蟹香，配上白醋就更能帶出呢種膏香，不過白膏比紅膏「流」，一個人食一隻都足夠（我已經好大食）。而紅膏除左無咁「流」外，膏身亦比較硬，有些少似膏蟹果種，不過味道比白膏或膏蟹更濃，頰齒留香。不論紅白嘅訓覺蟹蟹身都同樣好肉，而且唔拈蟹殼，要食時只需配少量工具即可（因為殼比較硬，亦唔好諗住用牙咬咁樣衰，自己踎屋企食就隨你啦，不過真係好難咬），就算唔點醋都好甜，海水味唔係濃，但一定啖啖肉，食到蟹腳都仲有得你食，食後一定會好滿足，好適合一眾蟹痴。

價錢方面未算好貴，2,3百蚊一隻，一隻大約1kg左右，不過以佢大小及蟹膏份量嚟講係叫抵食，當然要適可而止，因為我相信佢膽固醇唔低，無謂為食食到咁唔健康啦。

海的味道(上)

如果生活中，性係佔第二位，咁對我黎講食一定係第一位，由細就好識得去體會何謂食色性也，我雖然咩都食，總之但凡係食物，都可能會放入口，如果有人同我講泥係好好食，而且當場表面如何進食，及後再寫一篇食泥論文及短評的話，我可能會去親身感受下泥究竟有咩咁好食？不過我天生才能中，味覺算係唔錯嘅一項，應該係聽力以外最好，簡單講可以話係嘴刁，差在我未訓練到完全知佢用咩料煮同點煮，我諗要我廚藝再好些少時先可以好似食家咁準確。

曾經有段時間同一位好友經常到處品嚐各種美食，如果你問我最鍾意食咩菜，我一定答日本菜，如果種類放大少少，其實係我最愛食海鮮，而海鮮中，應該最鍾意係食生蠔，呢種海鮮應該係最能夠表現海嘅鮮味，而且唔同品種嘅蠔都可以食出唔同味道或口感，感覺有些少似純天然嘅廚藝，應該話海係個好偉大嘅廚師。自己試過嘅蠔款應該超過20款，最常見嘅Sydney rock,Irish rock,kumamoto,Rocky bay都食過晒，不過最愛嘅蠔款都唔係呢堆，亦唔係蠔王Belon（曾經食過000 belon，係好濃，after taste比紅酒更甚，但我唔係最愛佢），我最鍾意同樣係出自法國，但比較低調嘅Fine de Claire。當初對蠔唔係太熟識，係自己要求要爽口，但唔係好薄身，帶甜嘅蠔，之後店員就介紹左我呢種蠔。一試後，果然照足要求，無令人失望，食得出果種甜味係海水嘅甜，而唔係純海水的鐵味，而且佢唔係完全爽口脆身，都叫有些少肉，當食完後，更有種不遜於belon的after taste，一種甘甘地嘅餘韻留喺口入面，所以每次食完都對呢種味好難捨難離。到後來，法國蠔食得多，就又試下其他蠔，當時覺得應該cucumbery及creamy嘅蠔都各選一隻最愛應該最好，所以又搵人介紹d比較肥美。可能自己算係好彩，唔係試好多種，就揀左岩心水嘅Skookum，Skookum係美國蠔，無法國蠔果種尊貴，換返黎係有些似美國muscle car，一味大件，而且佢嘅creamy真係有些少似雪糕，更有些似啜落舊肥豬肉度，唔鍾意嘅人一定覺得「流」，但我偏偏鍾意佢咁極端地肥味，而且通常蠔係越大越唔甜，但算係中型偏大嘅佢都有意想不到嘅甜，再混雜少少海水味，真係岩晒我口味。(待續)