八萬五之炒炒炒

董生治港8年，唔少人都認同佢最大「功勞」一定係八萬五，今日我只想講句公道話，首先我並非撐起佢，我絕對覺得由佢治港係最大錯誤，唔多唔少佢有一大部份責任。

剛推八萬五時，亞洲金融泡沫爆破，香港一沉不起，香港最重要嘅賺錢棋子～地產業更一落千丈，你可以話幸運之神從來無降臨董生身上。但無八萬五，香港係咪就可以避過呢場風暴？我只會答，無可能，只係唔會有人於未到谷底時入市，繼而趕上成為負資產的尾班車，正確來說，係無咁多人負資產。

推出八萬五前，我明白董生原意係好，的確佢想更多人可以自置物業，最後更可減省唔少公共屋宇開支，長遠來說，壓抑樓市係應該，因為由英治時代，炒樓已經被普羅大眾視為賺快錢嘅機會，唔少人當香港地產係一隻金蛋，有幾多個係自住？無人知！但起碼知道有一大部份人係靠呢樣賺大錢，由樓換樓，錢搵錢。從而得知，香港大部份所謂嘅炒家（大部份中產）都係無咩實銷產業，到金融風暴時，呢個炸彈隨住董生嘅八萬五一齊爆破。呢個除咗係董生責任外，其實有唔少炒家都要孭飛，搵夠就收手啦，明知係個死井都係要死挖爛挖，你可以話董建華唔應該亂叫人入市，但相信香港無咩人會知道個市會跌到咁嘅地步，唯有董生去負起最大責任。

好多人都只會記得八萬五係董生嘅產物，但唔好忘記施政報告出前，呢個政策係梁振英建議，於早前，八萬五計劃係港英時代留低嘅包袱，只係由董建華未審慎作出評估後而拆開嘅巨型炸彈，炸彈拆前就已經知道香港樓市供過於求，點可以亂咁拆呢？要壓抑樓市方法好多，只係一直以來官商包庇，你壓個市，唔驚比班撐住香港嘅地產商插爆？可以話當其時政府處於兩難局面。到最後八萬五不了了之，負資產個個申冤，但班炒家有無諗過，你自住的話會有咁多麻煩咩？由你買層樓或供層樓時，就知道物業實質價值，你自住唔會有問題架喎！既然要怪人，咁呢班人有無諗過自己有幾咁笨？比堆錢你未知係咪賊贓就貪咗先，最後咩都無係應該喎，呢Ｄ叫做教訓，賴人前唔該反省一下，責任人人都有，家下得你慘淡收場咩？政府救市一樣唔知用咗幾多方法，一樣唔知用咗幾多錢去填！

到今日，樓市當旺，已經回復到九七高企時嘅水平，但究竟有幾多人會識驚呢？真係以為無咗八萬五就無事，唔好咁幼稚啦，大陸而家金融一樣蘊釀住小泡沫，爆起上黎，雖然未必爆得死你，但蝕多蝕少都係蝕。就算大陸宏調壓得住，都唔代表地價長期高企，一樣會有調整期，差在早定遲，差在班地產商想賺到幾時，佢地終有日會嫌地貴，終有日樓價會回落，永遠佢地先係贏家，投資唔係淨係睇自己，睇下大局啦，係唔係都炒炒炒，終有一日惡夢會再次降臨，只係下次會死幾多人。