白頭

我幾乎每晚都會到樓下公園坐低呌下涼，有朋友陪又好，無朋友都好，都係會落去飲下野坐兩野先自在。而家甚至去到每日咩人於咩時候出現都記得清清楚楚，相信果堆人亦記得有條粉腸晚晚都坐0係度唔知做咩，但可惜嘅係大家係唔會交談，可能只會稱我為路人甲或四眼哥仔。

前晚，食飽飯又到我嘅私家花園等我位朋友，我比約定時間早左足足個幾鐘就落咗去坐，唔係我無睇時間，而係想睇下今日又會有咩人會0係我個花園出現。坐左陣，我隔離個位嚟咗位素未謀面嘅阿婆，相信佢都同我一樣係嚟坐下食下風，不過佢個樣好親切，但又有少少哀愁，似等人多過似嚟坐，直到我朋友嚟，佢都一直不動於山，眼神亦只望住同一個方向。我開始聯想或投入佢個角色，總覺得佢好寂寞，果一刻開始諗”點解身邊無個伴陪佢？點解總係好似等緊某一樣久未回來嘅人或事?”。因為我通常見D老人家都係拖住個白頭伴0係度休息或者談笑當年，所以更加感覺到佢唔多願意自己一個0係度。雖然佢唔會知我留意緊佢，基至去猜想編導別人，但佢嘅故事，我一早編排好，只係唔多願去比佢承受我幻想嘅悲劇，亦因為我算係感性，當我所編嘅故事係悲情開首時，就好不然都會同情一下個主角，所以我就相信佢會等佢另一半。

過了一個多小時，我離開座位同朋友去買小食同野飲，經過10多分鐘後再返去，果位阿婆已經走咗，這時心情有些少忐忑，因為我想知個結果，我更加想知個阿婆有無遇到佢想見嘅人，由果刻開始回想起個阿婆那數小時的目光及動作，同時將自己帶到數十年後，我開始諗，我會係坐0係度等人果位，定係要人等果一位，一諗到呢一刻，個人就好空蕩，係我唔敢想像呢兩個結果，呢一刻我突然好怕死亦好怕孤獨，又再令我諗起生存嘅意義，更令我回想起身邊嘅每一位，呢種感覺似曾相識，悲觀時嘅我經常有呢種感受，呢個時候亦從來唔會幻想自己好幸福拖住另一半白頭到老，終於又發覺，原來自己呢一刻係幾咁寂寞。最後，我選擇完全投入同我位朋友吹下水，去忘記這難受嘅幻想。