現代吸血鬼

今日奇聞特別多，但最奇應該係仁濟醫院血液樣本被偷事件。我今朝於收音機聽完單新聞都打左個突！心諗：「唔係嘛，血都有人偷，仲要飲埋佢，唔通佢係尹天照？」

整件事過程無人親眼目擊，只係被閉路電視拍低，內容係見到有個男人偷左3個血液樣本，大啖大啖飲晒佢。家下人就捉左啦，據報佢係受到酒精影響，但其他動機仲未公佈，真係就連我都想訪問下呢位阿生：「請問你為咩偷血飲呢，係咪為左以形補形？定係口渴得滯無水飲呀？」我點都諗唔到佢會點答，希望佢唔好答我以為果杯係Bloody Mary，仲要飲一杯唔夠，要飲到第三杯先知原來飲錯野呀！唔理佢比咩理由，我都想接住問佢飲完有咩感受，有無覺得特別生津解渴，飲完有無肚屙呀呢類問題！但願佢唔好飲到杯有愛滋或者肝炎啦，如果唔咪，呢杯一定係最貴嘅紅酒。

我聽呢單新聞前，一直以為呢d係電視電影橋段，真係無諗過有人走去偷血飲，仲要做戲都話係因為吸血鬼先偷血飲啫，怕且都先捉捉呢條友去研究一下，睇下係咪真係有吸血鬼先，最好擺到佢去中秋，話唔定月圓時識變狼呀！

由呢件事睇到香港醫院真係無咩保安可言，唔好話呢類係個別事件啦，你有閉路，就有人睇住個mon架啦，定係保安員以為果度影住間bar呀?唔通d人唔知血好矜貴，就算只係驗病樣本都唔係話抽就抽，更莫講話捐比人果d血包啦！你無諗過有人偷血飲，都有諗過有人偷血掛！