你愛錢嗎？

當你望住自己個銀包，望住入面d錢有咩感想？你愛它們嗎？我會老實答你「我好愛」！前排，我睇左一段新聞，講而家好多都市人都患有金錢焦慮症，病徵主要係怕突然無晒錢，無錢喺身唔安落，日日都會計住收入支出咁，如果有投資的話，亦會每日提心吊膽咁過，總之擔心呢樣又擔心果樣咁，所以造成更多唔需要嘅壓力。

雖然我好鍾意錢！但我又唔會太緊張，呢方面係有些少矛盾，但好簡單，我有錢都係咁過，無錢都係咁過！最多有錢時會更識得享受，所以我都好認同「錢賺返嚟就係用嚟洗」！不過自己對好多野嘅慾望都唔會話去到泥足深陷嘅地步，我愛但不沉迷（不好意思，除左女人）。

其實都市人睇錢睇得緊係正常，特別香港社會入面要洗錢嘅地方太多啦，雖則話就話好多野已經叫比西方國家或先進國家平！但係你望下d樓價，你夠錢買嗎？幾乎好多香港人窮盡一生金錢都只係為左有瓦遮頭，唔係租到你嘔，就係供到你死，最起碼身處外國唔多駛諗呢個問題，人地地方大，無咁貴，起碼唔會食你大半份糧先（除左瘋狂嘅東京）。有時真係諗當我有二百萬時，我仲會唔會去供樓買樓呢？我相信我已經好有可能去左一個癖靜地，買間屋仔圈下羊。