意見書

而家好多大型連鎖店或比較有規模嘅舖頭同食肆都會有意見書呢樣野，通常整整齊齊咁擺喺cashier附近，每當比錢時總會望到，但望下個意見箱就通常都係空嘅。

通常香港人會咩時候寫意見書呢？經過觀察就知唔會係心情極好嘅時候。寫呢份野一定係都要挑剔，要玩文字侮辱時就會寫返份，就算唔知會唔會傳到上去比你老頂知，都照樣寫晒所有心中怨恨先算，不過咁都好，起碼佢發洩落張紙度，你最多只會見佢西口西面拎走份意見書再射你暗箭，起碼佢心理上會諗：「你都唔知我寫咩架啦！吹咩！」（但其實好多舖頭嘅意見書都會比人拆晒，衰嘅就掉左佢），但佢唔企喺度同你嘈算係咁。

可惜我都見過好多死纏爛打嘅人，鬧完唔夠，再寫埋，寫完再鬧，之後就會搭句：「你叫個話到事嘅出嚟啦！」，每次見到呢d人我就懷疑佢地心理壓力同社會怨恨一定係好重，有時見個店員都好好禮貌啦，只係做錯好少好少嘅事，你又何必趕絕人呢？佢生出嚟又唔係比你鬧，都係打份工啫。呢一刻我就會繼續諗，呢位人兄多數都係做服務性行業，平時受埋受埋嘅氣，就發洩去類似同行嘅物體度，之後果位受左佢氣嘅sales又出去做返同一樣野，咁就一個cycle啦！

人係要有要求，但都唔可以過火，嘈兩嘈就算啦，何必要當街當巷做到大戲咁呢？而且你反正要下一下度火啫，咁咪寫返份意見書囉，你入面寫晒粗口都無人理你，只要你唔係心理唔平衡的話，條氣應該已經會順返唔少。不過我真係好少聽香港人有人寫意見書去讚啦，與其係咁，份野不如叫投訴書仲實際，寫果個一定更滿足啦！

P.S.我呢度真係無咩人留意見比我，明明每日都有幾十人睇，但就係無人留，可能要得閒寫返下D撩交打嘅文先得啦。