真三國無雙5玩後評

今年其中一隻次世代遊戲大作－真三國無雙5於上週推出，出左第二日就走左去買，盛惠450大元，對比其他XB360遊戲，真係有些少貴，不過算啦，都係買左，而且出前已發佈大量消息講明今集好多野會變，包括人設、系統、武器，當然換到新機，畫面應該都進一步提升。

今集人設方面，由有消息公佈後就好壞參半，而且更刪除部份角色，更只有17位角色有其無雙故事，現有角色有部份技能係相同，對不少人來說是失望至極。不過能理解的是，如果太做得太完美，那出新一集時就毫無新意，相信是廠商有心編排，如果仲係覺得唔甘心，係呃錢的話，咁咪唔好玩呢集囉，等下一集更完美時先玩啦，無人用刀架住你條頸叫你買。

今集除左人設外，最大轉變係攻擊模式。以前每一代都係以輕攻擊開首，重攻擊收尾，稱謂C技，會用重攻擊收尾原因係攻擊大，而且各有特色，部份角色更可以輕攻擊及C技作無限連段，不過需要技術。而今集就改成普通攻擊已經無限連段，只要不停按就不會停低出現間距，但完全沒有破防能力，要破防還是要靠重攻擊，變相攻擊變得簡單，容易上手。而每個角色除了重攻擊各有不同外，更追加兩招殺陣攻擊，出法係按著防禦，再按輕或重攻擊，感覺似是投技，會波及身邊的人，但主要仍是單體攻擊作出技技，重攻擊更無法防禦（不過電腦很會閃，會一直滾來滾去），用殺陣式殺死武將會額外多一倍功勛。這個感覺不錯，但因為要按防禦來使用，感覺整個攻擊都要停頓，無左爽快感，不過善用格檔還擊技時用這招較好，比較易中，而且快，但感覺有些少似玩緊鬼武者。

另外好多留意到今集係可以周圍跳，又可以游水，可以爬梯攻城，唔似得以前咁一定要兜個大彎，仲可以靠高低落差造成奇襲效果，呢個時候敵人係唔識攻擊，感覺似番打仗。

而畫面方面的確提升不少，當然一定唔係最好，你仍然可見唔少頭髮位係硬彬彬，不過計算過機能所知，造得太細緻會引致遊戲不順，出現窒機情況，這也情有可原，反而好多景色都做得好靚，包括水的反面，到處的梅花樹，鋪滿雪的樹等，撞上這些樹還會飄下雪或花來。但最大問題係今集個死人地圖好難睇，又細個，話就話今集係次世代，應該係for高清，正常嚟講，部電視會有咁上下大，但唔係個個人屋企部電視都鬼咁大架，莫講話高清，有部份人仲係匿喺房用佢部21吋電視打添，真係難為玩家對眼啦，而且360版本會因為使用色差線引致黑暗室內或夜間畫面更黑暗，要用HDMI線才可解決問題，呢幾樣就真係唔夠user-friendly啦。

自己唔係多時間打，就尋日終於開晒所有角色，當然包括今集改變最大嘅呂布，亦係我最期待，想知道如此反傳統嘅武器會帶嚟咩新衝擊。在使用其巨大風扇（！）（不！應該是巨型手裡劍，又或者叫兩把方天戟交叉併合使用）後，發現佢今集再唔係慢吞吞，得件大份攻擊力沿自體型嘅角色，使用兩把武器後，速度極限提升，因應今集無限連段系統，佢嘅攻擊係快得無間距，而且攻擊力及範圍仍在。在前數集，我通常都會第一時間去虎牢關挑戰呂布，因為佢強極都有方法慢慢打死佢，但今集虎牢關，我試過多次失敗後就知道佢嘅威武，所以更有感，拎到佢之後應該係一個好屈機嘅角色，果然最後無失望。不過而家，只有個人等級唔算太低，我都有方法打死虎牢關的奉先大人。



今集要我比分的話，都會有80分，話晒換晒人設，雖然玩得嘅角色唔多，但係你諗深一層，又咩game可以比咁多條友你去用，叫你去諗晒成四十幾人都幾難，雖然你可以話出得倉卒，但其實從整個系統中，都睇得出佢係有心，而且破格改變玩法係唔錯，起碼叫搵到新意，由技窮嘅4代重新殺出一條血路。