減壓blog

首先先推薦一個常睇嘅Yahoo blog「那火星來的據說是空姐 」，睇個名就知佢個主人係空姐啦，講明先呀，我唔係有空姐癖先睇好幾多空姐blog架，我無制服癖好架！呢個blog何解好笑啦，都不外乎Yo小姐生動描述，加上唔同字型大小及顏色去令到某些句子更突出，而且圍繞呢位空姐嘅事的確係好搞笑，所以我都絕對有理由相信佢係火星嚟嘅！特別以一個空姐生活背後原來係「超低能，勁搞笑」時，果份違和感係最令人發笑，佢亦寫得好有心，我就真係唔會每幾行字就轉下色轉下字啦。

可惜呀，Yahoo blog唔接受外來留言，我無辦法去回應下佢呢份幽默。真係話時話，家下咩年代，Yahoo仲咁固步自封，而家咩blog host都可以有外來留言，甚至匿名留言啦，佢唔係諗住咁樣會多些少人用佢個blog嘛。

之後仲有個Sina blog「無聊的分享」係可以絕對減壓，佢個blog主係絕少寫自己野，基本上成個網都係笑話，不論陳年老笑話，創作笑話又或者冷笑話，當然有部份唔多唔少係似曾相識，但有時睇下D笑話真係幾輕鬆架。如果有部份笑話係真係blog主自己創作的話，我相信佢係幾有創意同十分風趣嘅一個人。

呢兩個blog我幾乎日日去，「無聊的分享」就差不多日日更新，日日有得笑，而「那火星來的據說是空姐」就要睇佢有無飛啦，無飛的話，兩三日都會更新一次。

P.S.如果ah-yo嚟到，我想講句：「我好鍾意你中秋個大燈籠呀，唔知你有無更加驕傲呢？」，哈哈！