I don't wanna buy a CDs with dictionary inside

有留意開Chris個Blog就知道佢買左盧巧音隻新碟。睇返新聞先知隻碟係Candy男友Eric So（唔知點解我曾經將佢同Michael Lau調轉,算了這是題外話）去設計包裝。話說果日我係同Chris一齊出去時買嘅，買左之後，佢話好似朱古力盒，都算唔錯（入面嘅相真係幾好），但略嫌收藏麻煩，因為並非一般CD盒Size。

咁真係講開又講，香港由唔知幾時就好興呢類好浮誇嘅CD盒或包裝，不論Size及包裝，又或者內裡包含的附送品，都係有咁大得咁大，有咁誇得咁誇，分分鐘個盒比本雜誌仲大。老實啦，係咪要平面面積大先可以落手設計得好？定係要標奇立異先顯出叫做設計過呢？還是越大份，買嘅人就覺得越抵？唔講咁多觀點立場啦，單單講Design算啦，Design原意係方便生活，方便他人，咁試問你整個咁唔user-friendly嘅盒出黎，又叫人點收藏呢？定係expect個個屋企幾千尺，直情間埋個房出黎擺下碟聽下歌？當然大部份消費者唔會覺得係問題，可能真係覺得抵添（有唔少年青歌手嘅碟都好鍾意送現金劵，送下書，包裝到隻碟厚一厚）。不過好老實啦，我就真係嫌呢堆碟大到阻街先唔買。

我買碟只求聽歌，封面設計好唔好，當然係重要，我甚至可能會因為鍾意隻碟嘅封面而買，但如果係大大隻又難擺的話，咁就多謝啦，請恕我屋企無幾千尺。