07書展後記

今日當我興奮咁玩緊Blogger layout同scripts之際，Chris就打左電話黎話佢放左工，急call我去書展啦，雖則都約好今日去書展，但仲諗住一個下晝都會繼續寫scripts滿足下自己，夜晚先去書展衝刺奮鬥。如此急忙情況下當然係遲到收場，但一到灣仔就已經見到人頭湧湧，唔知仲以為今晚放煙花。

未行到會展，就已經塞死左喺中環廣場附近，個個汗流浹背以龜速慢步推進，由當時已經諗「呢次一定行得辛苦過年宵」，甚至當其時有卻步嘅感覺，首先我怕去人多嘅地方，二黎最主要係我今日係抱恙到會，我仲行得走得已經係奇蹟，不過約好人，而且唔想錯過書展，咁我點都食幾粒藥挨埋落去。迫左幾個字，終於由稅務大樓後面個舊hall入口迫到入場，入到去我就開始不停插貿易發展局，都唔知佢地點決定場地，好似迫人一定行晒每個hall咁，佢以單線行車都由佢啦，可能佢怕出出入入行雙程會混亂，但係都唔該佢整條路闊些少呀，咁佢反正預左人流管制落欄困羊，點解佢唔比人行都行得舒服少少呢，兼且佢都希望每個hall都有人流，佢怕咩所有人迫死晒喺最旺場嘅hall 1,2呢，佢開放多幾條路比人上落唔好，好似趕羊咁趕，搞會場班柒碌用屎忽諗野架？最後咪又係個個上到hall 5,7，睇都唔睇就即刻行側邊個出口閃去其他hall，你話係咪晒Ｘ氣呀，最後連走個出口都係一定要經Hall 1，好彩我順住行，我唔跟路線係都要仆去睇我睇嘅野先咪柒左。

其實年年書展差唔多，只係書比較平，我唔知今日有幾多個人係專程黎買哈利波特(我想講外面都有做特價，唔駛入黎迫架)，不過今年確實好似比較多人。我今年出奇地有目標地買書，寧寧舍舍係買一本奇珍「追渣沽」，一本由我頗欣賞嘅Blog友渣估所著，其實我不嬲都有睇開佢個blog，佢本書亦即係記載佢個blog一路以黎嘅文章，可能無睇開會覺得我好無聊，為咩買一條友寫嘅blog文，仲要大部份我已經睇過，但真係擦鞋講句，呢本係我嘅心靈雞湯，渣估所記載唔止幽默，間唔中都睇到幾分感性，而且真係會睇到會心微笑(我甚至睇到某D位會大笑)，以一個老闆黎講，我一直覺得佢係成功，而且作為一個都市人，佢亦算係我眼中嘅成功人士，不論事業眼光同埋社會哲學上。佢本書可以話輕鬆，但唔可以話無得著，平時睇佢個blog就已經學到唔少野，不論做生意又或者待人處事都好，所以話就算部份內容我睇過，我相信我一定會得閒就拎出黎睇下回味下(好似已經講到似係自己出書)，呢本書已經進駐到我廁所屎塔及床上閱讀坊，手拿閱讀有助通便舒壓，如果你唔信我所講唔緊要，自己買本睇下，唔怕對住電腦可以到渣估個blog到睇。

另外今日書展最開心係見到陶傑，重要係佢唔係出現於簽名會，而係出現於茶杯出版個檔口，果度人唔多，我都係咁岩行過就見到佢，果刻我好想拎佢簽名，但手上無佢嘅書，最後當我買左佢本書後佢又走左，真係失落至極，雖然已經打算買佢本新書「莎士比亞的安魂曲」同埋林夕本「我所愛的香港」，但猶豫好耐本打算過一排先買，係之後見到陶傑先唔執輸衝左去買，算啦，早買早睇仲平D添。