電車男與干物女

前年電車男大熱，多得呢套作品，先至令大眾更清楚了解於日本已有十多年歷史的御宅族及毒男，此名詞沿用至今，更成為攻擊他人時不可缺少的名詞，其使用方式不外乎，「你呢個毒男！」「你自閉過電車男！」「哇，你真係毒Ｘ到無人有！」。以上等等形容詞及造句都被各大網民普及使用、汎用及濫用。但除了御宅族是蓋括男女兩性外，其他都是主要攻擊男性的用詞。

到今日睇蘋果，我又學到個新term，呢個名詞可謂電車男反擊女性專用，其名為「干物女」，意指終日自閉於家中，放工放學即刻返屋企，無交際，極度「烏where」，間房亂過堆填區呢一類女性，淨係聽形容都覺得恐怖，感覺比電車男更過火，毒男都會玩下玩具，都要出街，都會有一班志同道合，但干物女真係自閉一樣，簡直好難想像現實中會有咁嘅人，腐女我已經覺得恐怖，估唔到仲有嘢可以青出於藍。

而家男網友們唔駛下下鬧人港女、八婆、臭Ｘ啦，眾網民又可以大玩人生攻擊，唔理對方係與唔係都好，鬧左先算啦，相信遲下眾討論區及新聞組就會充斥一堆攻擊名詞，遲下分分鐘又多幾個新term，可能下次叫「飛機男」「豆腐女」，總之就口舌戰火連綿不絕，你插下我，我Ｘ返你；你話我毒男，我插你干物女，有咁毒得咁毒，理得你人生攻擊啦，不嬲中國粗口嘅精髓就係禍及祖宗十八代先心息，人生攻擊？算得上什麼！

現有名詞詮釋
御宅族＝喜歡留在家中，無甚交際，男女合用
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
獨男＝汎指單身男性，本無惡意，及後被濫用為攻擊名詞
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
毒男＝有別於獨男，但由此名詞衍生，意指無伴侶男性，
喜好ACG達瘋狂程度，除了買ACG產品外只會待在家中，少交際，及後被濫用
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
電車男＝毒男、獨男及御宅族的男用代名詞，全因由2ch某獨男於電車英雄救美至求愛真實事件而衍生的作品及名詞
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
腐女＝喜愛ACG，特別是指喜好BL同性戀耽美向物品的女性，亦有人指喜愛Cosplay的女性
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
港女＝並非顧名而指香港女性，正確是指一些熱愛名牌、脾氣差劣、貪慕虛榮的女性，及後被濫用