愛上女主播

雖然每晚都會望住個公仔箱，但已經記唔起自己有幾多年無睇過公仔箱內所播的肥皂劇，而我每晚睇嘅永遠都係同一個台-NOW財經台，因為對股票算有興趣，間唔中有些少研究，所以每晚都會跟實返果日個市況，而且家人有玩開股票(自己近月無再玩)，所以我就變相就做左佢地嘅市況接收員，又或者我老媽欣賞我記性好，總係要我記住某部份藍籌個價同波動，所以我就每晚數字送飯。

由初初有呢個習慣時，我都好留心睇、聽同記，到後來睇耐左，就變成更留意每晚個女主播林燕玲，每晚睇住佢聽觀眾電話、同每位大師分析及報導市況，總之一由佢開口講野時就特別投入，更加專心望住個螢光幕，有時就咁呆住望，搞到餐飯食左我個幾鐘，唔知以為我睇住堆數字入左化境。

真係記唔起自己由幾時開始對林小姐產生起興趣，雖然我不嬲都覺得佢尚算幾靚，大大方方咁，不過就無諗過自己會為女主播著迷。從此，除左睇住個市外，就係為左睇住佢，當然我唔會同屋企人講我每晚咁勤力係為左睇佢啦，唔多唔少好似好變態咁，不過佢真係越睇越靚，仲要大大方方、溫文儒雅；而且做足功課、對答如流；加埋禮貌應對、笑容可鞠（呢Ｄ好似係主播必要喎大佬），真係幾難唔吸引我，有時真係有些少衝動Phone-in去講兩嘴問下野，可以安慰自己，都叫做同佢講過句野。