故事題材

其實近日係比較忙，所以都算少左更新，不過想寫嘅野其實堆積如山，腦中無時無刻都諗「呀，今晚咁寫好無呢？今晚寫邊樣先好呢？」，之後腦海中就不斷浮現出文字。

由我開始寫呢個blog時，就一直計劃去寫一個長篇小說故事，初初都諗左唔少題材，亦問過唔少意見，而自己以前都叫寫過下長篇故事，雖然事隔多年，但仍然相信自己有信心寫落去。頭一個月，曾經試過起初稿，但唔係太滿意，最後放棄左。可能係因為一貫原則，我堅持嘅，並非單單要自己風格，而係一定要創新，最起碼內容唔係常見，又或者充滿幻想性而無抄襲嘅原創故事，但總係未諗到，甚至單單連寫咩類型都諗過好幾次。根據朋友意見，我係應該寫懸疑類或牽涉大量心理層面嘅推理故事，但自己近年已好少睇呢類書，怕自己handle唔到，最怕係寫到個殼，但係描述唔夠精細，咁就無謂寫出嚟獻世啦。到前一排，終於決定寫較為年青嘅劍與魔法或超幻想世界故事，雖知未必可吸引全年齡讀者，但係應該可以滿足到自己滿腦嘅幻想力，我都真係希望可以寫出個感染到讀者去覺得「係喎，呢個世界可能真係咁！」嘅故事。

可惜，近日較忙，要落筆真係有點兒難，而且每日都有更多諗頭，可能真係唔落左手先真係好難定落嚟，睇怕我一到得閒就會著手去寫，希望各位有緣觀看此blog嘅讀者到時俾下面，睇下評論下。