不老的傳說

公司有位女同事W小姐，算是其中一個比較熟絡的一位，何解會比較熟絡，最主要原因都係因為佢看來係年青一代，仲係玩下蒲下，同一般廿幾歲女仔無咩分別。但由多年前認識她時，已知道她育有女兒，在20多歲便結婚了，不過當初並不知道她的年齡，更莫說她女兒的年齡。

直到兩年前，在傾談中，她提及她的女兒已在讀書，當初我怎去想都認為是小學，但她竟然說：「我個女升中三啦，唔知揀咩科好呢？」果一刻我完全忽略左佢個問題，呆左一呆，再望多望佢一次！真係心諗「唔係嘛？點睇你都係廿幾歲，最多廿到炆啦！」我當時無答佢個問題，好直接問左個女人禁忌。

「W小姐，其實你幾歲？」
「你個衰仔想知嚟做咩呀，我結左婚啦，有老公啦！」
「我知我知！我都係問下者，唔想答就算啦。」
「其實我3X啦，個女都咁大啦，時間真係快！都見左你好幾年啦。」

仲以為世界以化妝品為皇道，化下妝就可以後生些少，但以W小姐的淡妝，點睇都唔似有咁嘅神奇功效！當然我無再問任何關於呢個問題的一切，但其實我真係好想問佢：「你一日食幾多包防腐劑先可以咁青春？」

其實近嚟，開始都睇得出佢係老左啦，叫做似返個30歲，但仍然同實際年齡絕對有出入，可能係防腐劑都過埋期，但佢仍然未到期！而佢都可能意識到自己無咁多青春啦，近來打扮，髮型比之前更後生，到我再望望佢個女張相，真係話兩姊妹都一定有人信呀。

望一望鏡，照下自己個衰相，見到自己鬚根多左，但個樣唔知點解都後生左，連身邊朋友都話：

「哇，你唔係打羊胎素嘛，好似比之前後生左喎！」
「係呀，我錢多得滯咪打兩野囉，後生到入馬會都比人查身分證呀！」

好老實，我都唔知點解，仲記得以前搵工時同人講自己幾歲一定無人信，總會加多句：「先生，真係你本人呀？你點睇都唔似咁後生啦。」而家我都想回番所有人一句：「我只係無老過者，我嘅青春已經停留左果一刻啦。」