維港上空的曇花

昨日，全球最大型的客機A380再次來港，更於今早於維港上空低飛橫越，飛行高度比四百多米的國金仲低，雖然我並非飛機迷，但這難得一見的情景係不容錯過（其實我真係諗過佢撞落國金，咁我就會第一時間睇到呢個壯觀場面，但如果係真，都唔知係驚定喜啦），而且小弟於灣仔區工作，離碼頭甚近，所以今早上班前就相約兩位同事同行到灣仔碼頭觀賞這可貴的一刻。

在八點前，我地三條友已去到碼頭邊的天橋上，當時四周駐足的人群不少，多是慕名而來，相信亦夾雜唔少阿叔阿嬸見人多就以為有錢派而擁來。就在八時零五分左右，見到相機佬舉晒機就知機到，抬頭一望，就見到部巨無霸飛過，我真係電話都拎唔切去影就好快飛過左，望住佢飛向柴灣方向，周圍D人繼續遙望，又「哇哇哇」咁聲，而當中十個有九個都係講「哇，乜真係咁鬼死大部！好近呀！」。直至見唔到部機，所有人都各散東西，所有人就一邊行一邊繼續討論。

其實討論咩呀，好多人都見過飛機於市區飛到咁低，以前啟德時代，九龍城頭頂永遠鬼殺咁嘈，抬頭一望就見到飛機肚，果種近真係好似摸到咁。以前有時都會去望兩望，更上過果頭D樓嘅天台近距離接觸，呢種經歷到而家都好難忘，因為當年未坐過飛機，所以對飛機好有幻想，成日諗，點解一舊鐵可以飛上天呢，等於細個唔明點解一舊鐵可以浮於水上一樣。

A380飛過的一刻真係好曇花一現，同時諗起啟德時代，頭頂有飛機飛過的一剎那，更遺憾係我未試過喺啟德坐飛機離港或抵港。如果大家想懷念下啟德或睇下部Big Mac，聽朝仲有機會。