書

近日刨書刨到好瘋狂，幾乎工作一有空檔就係睇書，搭車又係睇書，返到屋企都係睇書。呢一刻同時睇緊嘅書總共有四本，一本係剛買嘅「機率遊戲」，第二本係借來的「戀人絮語」，第三本係日本輕小說「月兔升空時」，而最後一本係呢兩日先接觸，從我細佬手中搶來的「那些年我們一起追的女孩」。四本書都係唔同題材，完全係南轅北轍搞不通，突然我相信自己癲起上嚟連我自己都驚呀！（唔好意思，近來慣用左鄭中基呢句台詞）

四本書都係呢個月先開始睇（我唔習慣拖住睇書睇幾個月，通常數星期內解決），應該話係近期無咁忙先開始睇得咁密，可能我自己都唔係太想靜落嚟，而費事分心嘅解決方法就係睇書，睇書時我最能集中精神，而且我之前都講過，我想寫長篇故事，我要做更多參考，我唔想求其幾筆草草了事，而且又唔係寫散文咁輕描淡寫，而且我已經搵到解決題材過多而無法開始寫作呢個問題嘅方法，辦法就係一次過寫數個故事，同時連載。雖然呢個方法係費神，但以我性格，我應該係可以應付得到同時寫作唔同題材，不過，我唔係天才，我發現自己最大弊病係唔太識寫輕鬆故事，但今次數個題材中，我唔想全部灰暗悲情，我諗我應該多d參考呢類作品。