那些年，我們一起追的女孩

今日睇得最耐嘅一本書就係標題所講嘅「那些年，我們一起追的女孩」，呢本書係人氣作家九把刀所著，而身為九把刀粉絲的我家小弟就比左呢本野我睇，兩日間我就差不多睇完，睇書期間係極聚精會神，接住不停翻頁，差不多無間斷。我雖然唔係第一次接觸九把刀，但竟然最認真睇就係今次，可能本身佢呢個故事好輕鬆，而且充滿青春、校園笑料以及其個人真實經歷，所以可以唔駛點用腦，而又可以感受多一個人嘅年輕歲月。

睇本書時，我就不停跟住內容去幻想當時真實情況，雖然我唔係台灣人，但我真係投入到想像自己變成其中一人，唸著國語重演每個片段，雖然只知道九把刀係咩樣，而其他人係點我係好難想像，只能單靠文字嘅形容以及想像，去營造我腦海中的每位主角。睇到咁上下，大概都估到個結局，但在這之前，我已經想好一個甜蜜嘅結局，係由我去想像的。所以當我估到結局後，其實我已中斷閱讀，我想保留我一切想像，暫時唔睇住，剩下嘅一小部份就請先繼續比我完全滿足自己嘅幻想再繼續啦。

一邊睇就一邊笑，本書其實幾甜，好青蔥，亦好歡樂。不過突然間有種失落感，可能係發現到自己離青春越嚟越遠，但我真係幾想再次感受果種歲月，呢種矛盾先叫人頭痛，再諗起以前拍拖時嘅惡行，真係有些少羞愧。除左投入角色外，我不時都諗起以前讀書時嘅經歷。曾經有人講，讀書時唔一定要拍過拖，但無鍾意過人就好似無讀過書一樣，無青春可言。某程度上我幾認同，而我自己於讀書早已超過領域，於我中二時，就拍了第一次拖，歷時係五個月，雖然呢個係初戀，但意義不大，所有野都好似行雲流水，來得快去得快，無咩野係刻骨銘心。反而，每次暗戀都叫我痛不欲生，甚至到而家都仲好記得，只係感覺唔同左。當時，最後都同左果位暗戀三年嘅女仔一齊，但因為自己嘅愚蠢，又再一次失去，感覺上自己白費左三年多，仲要係一手摧毀，此乃人生感情線上第一錯。及後有我同另一個女仔嘅一齊兩年半嘅經過，以前我曾經有諗過寫成故事，因為可以寫嘅真係太多，要開心有開心，要悲情有悲情，我唔記得點解自己無寫，可能當時自知自己文筆有限，唔想糟蹋呢段經歷掛！？到數個月前，小弟應承過一個女仔，係我前度女友，我同佢講我會將大家的四年嘅一切編成故事，但結局可能未如現實，而佢亦同意左。雖然我未著手寫過，但我諗我總會寫，除非我無應承過寫啦，只係唔係呢一刻。不過可惜嘅係，我可能只會分享比佢睇，始終．．．我仍然好介意。

到而家，我其實都想寫返自己故事，但係我可能唔選擇以單一人物同時段啦，如果好似九把刀呢本咁，只寫愛情，我唔得，我讀書時雖多姿多彩，但無營養嘅太多啦，無謂比人知以前d黑歷史啦。不過我唔會話叫做寫傳記，我始終唔係傳奇人物，無法高攀「傳記」這二字，我只係想將經歷寫低，感覺似係由今日寫起昨日的日記一樣。