野良犬

劇透注意

姑勿論野良犬何解！始終我係唔多唔少受到呢個意義不明戲名吸引而入場睇，第二個原因就係因為拍呢套戲嘅人係新導演，我就係為左新鮮感同驚喜。

幾日前，拉左幾個唔知頭唔知路嘅朋友去睇呢套戲，雖然大家事後都有討論，不過唔知佢地有無後悔睇呢套戲啦。

由未睇前就諗緊套戲會唔會有些少似愛作戰，我睇見陳奕迅d死人造型就已經咁諗，加上係新導演郭子健自己編埋劇，希望會好似愛作戰咁，會帶嚟驚喜，但同時間我又諗起黃精甫，希望郭子健唔會又係一個玩另類玩鏡頭外加自大嘅人。

成套戲個故事好似曾相識，如果係有睇過「口袋裡的戰爭」的高達迷，就更會發現個結局係個倒模，可能唔駛去到結局，睇到一半已經會咁想像，不過我當然唔係話佢個故仔係抄，呢類咁嘅結局出現過九百幾萬次，都係一種意念啫。

其實個導演算係識講故仔，起碼唔算零碎，但如果你係有要求些少，就會發覺好到喉唔到肺，首先陳奕迅同林苑嘅關係著墨太少，最後林苑於唔知情之下殺左陳奕迅呢段根本就唔可以帶出果種反差，本應如果要做到令人痛心，覺得感人的話，就起碼要於兩人關係中落多少少功夫，而唔係見過幾次，相處過咁少時間就做得到由天堂到地獄嘅差落感。到頭來你會諗，不如無林苑算啦，講多些少陳奕迅同個細路仔仲好，一係你就刪咁d多餘無謂野同角色，唔駛下下將個故仔講得咁白，將陳奕迅同林苑個故事拖長。

第二，就係要講個導演編得個故仔太白，驚死你唔明咁，由好多位變左多餘，部份對白更加感到突兀，我諗佢唔應該第一次就執導自己個故事，故事自己寫，有d位係自己先明，有d位係多餘時，拍出嚟自己係唔會覺，因為你寫故時就已經有導成一套戲嘅概念，但文字同拍出嚟好多時係兩回事，唔係好多人有天份去做編劇同時又執導，唯有分開先會睇得更清楚，變左我知你故事想表達乜野，但同時間覺得唔係下下做到出嚟，呢d問題變左唔關演員事，係導演功力問題。

黃精甫出名鍾意玩鏡頭，可能有人覺得郭子健呢套戲都刻意有咁去玩，但其實細心睇，係無咩特別，反面你會睇到有些少幼嫩，雖然在鏡頭擺位好多時有別於其他電影，有時又拉下鏡迴轉視點咁，係．．．無錯，用嘅方法係無錯，但好多時係多餘，好似陳奕迅衝入去細路屋企比細路發現，之後同佢講野果part咁，唔駛下下轉來轉去喎，你想表達乜先，兩個人交戰緊咩？兩個人嘅掙扎？其實果個位係無劇力，你集中由橫切影住兩個人對話時嘅表情可能仲好啦。不過好多時我懷疑呢套戲個剪接係有些少問題，唔知咩原因總係有種就散就散咁。

配樂方面其實本應係唔錯架，但套戲入面出現過兩次配樂斷續問題（唔好同我講係戲院問題，我問左有睇呢套戲嘅朋友都有發現），仲要係好明顯，唔知點解咁都可以收貨，我同行朋友更鞭埋佢收音好差，呢樣我都由佢啦，唔講唔覺嘅。

如果要講有咩值得睇，我諗可能係演技啦，雖然唔係突出，但勝在個個夠自然，陳奕迅應該係演得最好果個添，真係估佢唔到，而曾志偉就唔好提啦，浮誇得自然算唔算演技呀，佢一貫風格，真係頂佢唔順，而最神秘嘅張國強喺套戲入面個角色幾型，佢演得入型入格，配角中最搶眼。

成篇影評雖然係不停鞭，但唔係話套戲唔好，只係我知個導演係有少許天份，只係呢套未拍出水準，係咪真係感人就睇人啦，但要睇的話都可以接受，你起碼唔會覺得晒左錢睇呢套戲，我鬧得勁只係我要求高，我希望香港電影業係可以繼續落去，唔好有青黃不接嘅斷層。