黑幕謎情

劇透注意

就因為一張免費戲飛，尋晚就睇左呢套戲，不過免費睇戲嘅唔係我，我係去陪人免費。原本都有可能諗住睇呢套，不過係入戲院定係買碟睇嘅分別，但無甚意見嘅我就叫左朋友決定睇咩戲，佢最後都揀左呢套。

睇前我完全唔知套戲大綱，少少野都大概知，因為睇雜誌時就知係黑幫片，但內容就無細心去睇啦，呢個都變左近期習慣，因為睇左大綱就變到少左驚喜咁，至於揀戲方法不外乎導演、演員及戲名。

呢套戲俾我感覺好教父，我從來唔知俄國黑幫係咪都好似黑手黨咁，但係套戲就描寫得佢地好似黑手黨，唔同嘅只係佢地用刀，唔用槍，我都知現實中俄國人殺人鍾意用刀，所以套戲入面好多血腥場面，而且d血係噴出嚟，睇得我鬼咁興奮，我最鍾意呢類暴力美學，我諗呢個亦係套戲定為三級嘅主因，雖然係有性愛場面（唔知個妓女係邊個，但係好靚），男主角(Viggo Mortensen)浴室大戰時更全裸，但我反而認為性愛場面嘅三級程度應該唔及暴力及黑幫渲染三級。

套戲個故事其實係普通，又係黑幫又係臥底，新意就無乜。先由一個演助產護士嘅女主角(Naomi Watts)，在當值時拎左本難產去世少女嘅日記開始，本應由日記找尋去世少女親戚，替遺孤找回親人變成於日記找尋犯罪線索，繼而．．．．．

但係個導演組合得個故事唔錯，佢逐少逐少將個故事慢慢講出嚟，再由一本日記嘅順序去牽動，雖然無咩解謎性質，但係佢咁做就好似吊住吊住你，你就會投入到個故事，外加暴力，黑色風格配合下就成為呢套戲。

因為套戲背景係英國，但就圍繞一堆俄國人，所有人都滿口俄文，而且Viggo Mortensen更練習了用俄國腔讀英文，聽落去都幾自然，甚至覺得佢真係俄國人，因為佢一舉手一投足都撇離了自己美國人嘅身份，真真正正代入到自己個角色。可能就因為咁，呢套戲異國味濃，加上配樂後，感覺似喺俄羅斯多於英國。

套戲有個好大賣點就係紋身，Viggo Mortensen身上足足有43個紋身，背上那個克里姆林宮更是精巧，而在入幫紋身那一幕更說明了每個紋身的代表性，在這裡，黑幫味道係濃烈，相信好多人睇時都會覺得黑幫紋身真係好型（我無叫你去紋呀）。我諗化妝都用唔少時間。

如果你係唔怕血淋淋，又或者想回味下教父，呢套係唔錯選擇，再唔係，去睇Viggo Mortensen有幾型，睇Naomi Watts（其實我認唔出係佢）幾索都得！