童心未泯

近日懶打blog咗，最大原因係因為掛住打機，而罪魁禍首係高達，搞到近來成個人熱血咗，打起機嚟時，人都後生埋。

講起高達，呢套真係一套無人不知嘅作品，真係分分鐘走去問個阿婆：
「知唔知咩係高達呀？」
佢都會識答你：「知！機械人嚟嘛，我個孫仔成日叫我買比佢。」

要講經典作品，高達當之無愧，到而家仍然年年不斷出動漫、模型、figures、遊戲等商品，帶脅唔少商家及公司，製造好多搵錢機會。

有時，同朋友出街，身邊都不乏高達Fans，好多時坐埋，幾個大男人就會講起高達，高談寬論起嚟，有時講下機設，有時講下故事咁，都幾熱鬧，不過旁人聽到就可能覺得：「哇，咁大個人仲睇卡通！唔通係毒男，等等等．．．．」，可惜未遇過真係有人講到出口，如果唔咪，我一定答：「高達係男人嘅浪漫，同我愛車愛女人一樣！」

有時真係覺得自己係遺傳唔少老豆嘅精華，連我都自認我係大細路，仲係會打下機，睇動畫，睇漫畫咁，好多時同老豆嘅談話內容就係講呢d野，感覺幾似兩兄弟架，嘿嘿！