黑色文化

從日本進駐香港多年的無印良品，一直大受香港人歡迎，其簡約風格吸引不少人，簡接令室內設計風格唔多唔少都受到影響。無印產品雖然唔算平，係叫做貴過眾人普遍認為價廉的Ikea，但又未算天價，所以大部份香港人添置家具或用品時都會考慮選購。

日本多年來未受無印影響前，日本人已十分喜好簡約，多以純白或單淺色系為主。原因好簡單，廣告都有教「less is more!」。直至近日，小弟睇到部份雜誌及報章（蘋果日報前日有提及）都講近排日本大玩深色tone，而且以黑色風格為主，大玩黑文化。

其實黑色都叫簡單，但如果以室內設計嚟講，黑色係幾少用到，因為黑色望上去令空間感變少，而且好易看到有塵，要經常打掃先可保持到新嘅一樣，所以黑色還是可免則免。不過，睇過部份展示後，發現以黑白搭配後，時代感好重，而且簡約味更濃，又唔會好似全白咁齋，感覺都幾好，如果日本可以持續大興落去，相信香港都會好快跟隨，不過就大家都知，抄都要抄得好睇嘅。

黑白灰呢三隻色，都係我最愛，如果有日買樓裝修，相信都以呢三隻色為主，其他顏色免問（雖然我黑白灰就最愛紫色，但用落室內設計真係大膽得滯）。不過其實由日本仔玩黑文化前就有諗過大玩全黑，牆身全用暗啞黑鏡，地版以黑色木紋條堆砌，應該幾型，不過一定無乜人會欣賞，望到都覺得恐怖，可能到時朋友們要來作客都要諗諗。