精神食糧

自從免費報紙面世後，香港都唔知少左幾多人買報紙，我諗班搞傳媒嘅，都無諗過有今日，生意會如此難做。

不過免費報紙就真係令到多左人去睇報紙，以前買份報紙要比錢，幾多人要慳埋慳埋一蚊幾毫車錢，又點會走去買你份報紙。而家隨手就可以拎到份，真係可以話幫到唔少人。除左呢班人外，仲幫到唔少靠賣紙維生嘅人，每朝搭地鐵，一定會見到有班人圍住個欄悲嗚，佢嘅叫聲同表情就話你知佢好想要呢份報紙，到每朝麥記，最多人唔係嚟食早餐，而係嚟拎佢份免費「頭條日報」，個個大大份咁拎，仲要係搶屎咁搶。

原本報紙係一份精神食糧，但對呢班拾荒者嚟講，呢D就係佢地嘅食糧！初初我都唔知點解呢班人會拎咁多份，行下諗下，先諗到佢地應該係拎去賣，初初我甚至以為係某部份地方或地鐵站先係咁，但問過朋友後先知，係全香港咩地方都係咁。

一份免費報紙一日大約印五十萬份，我諗最少有三成係拎左去賣，除返每個人最多都只係拎到十幾廿份，拎去賣錢係應該唔多，但呢班人日日等個幾兩個鐘去拎，就係為果幾蚊。

一諗到呢度，又係悲哀，特首話香港經濟已經史前無例地好，又話儲備多到水浸，但點解我永遠只係睇到一堆窮人。