悲劇人物

悲劇人物

作曲：楊芷君｜填詞：林夕｜編曲：Stanley Leung｜監製：Alvin Leong

談情是為歡喜 無須啞忍受氣
只得你 還沉迷淒美
你沒法 笑著去別離

情人若愛不起 離去是種福氣
得不到 當做看不到
卻恨你 享受被拋棄

＊你固執 或放任 不管是否試過合襯
常為了剎那的吸引 得不到應得的教訓
纏綿後便慶幸 為對方好過了亦興奮
大家都替你氣憤 要珍惜你自尊心＊

＃重複的眼淚 就是你自欺的安慰獎
你擅長 創造背叛你的失意賣相
是你堅拒平凡對象 習慣活在遐想
為膚淺漂亮 長期舔著失戀的創傷
你擅長 製造你無悔的偉大形像
凡是歌裡有悲哀這個字 (你)才願唱＃

忘掉現實的你 沉溺於悲劇美
天生你 談情如選美
這樣愛 注定要別離

凡是沒法得到 才抱著不捨棄
不爭氣 有誰憐惜你
眼淚會 逼人避開你

Repeat＊＃(＃)


又係林生一貫悲情風格，好在唔算係行貨。張敬軒唱得比之前更有感情同穿透性，但略嫌咬字未夠清晰。
我選此為本周廣東歌中最強推介，在此亦將呢首歌送比我一位朋友。

天才與白痴

近日(其實唔係近日，絕對係old news)九歲神童入讀浸大數學系惹嚟唔少社會迴響，再加上之前十四歲果位妹妹仔，可以話變成香港熱門話題！今日聽收音機聽到，又有一個15歲學生於英國考獲12A*成績。短短一年間，香港出左三位神童，可喜可賀，又再證明香港人係面子緊要，最緊要有咁揚得咁揚，好似要話比全世界知，只係得香港會出神童！

其實問心，香港有如此資優嘅學生，我都感到少少自豪，特別見到果個稚氣未減嘅九歲學生時就特別覺得佢勁。一個九歲小朋友，可能仲食住糖睇卡通片，可能連自己為咩返學都未完全清楚，但呢位九歲小朋友竟然就尤如一個愛因斯坦再世的出現，繼而話比人聽「我要讀大學啦！」睇佢D對答確實比同年小朋友成熟，甚至比十四歲果位更識得諗，屋企人亦算係比較低調，無神童女咁浮誇(好老實，唔係偏見，14歲果位妹妹仔嘅屋企人好似出嚟做大戲咁)。雖然我唔係太贊成咁早入大學，但呢個小朋友確實厲害，而且以資優生提早入學的話，數學系總比讀醫好。

前幾日睇陶傑評論，內容就係講呢件事，而佢好明顯好反對個妹妹仔讀醫，首先，根據佢嘅評論，讀醫唔係一門技術，心理要素係好重要，唔係一個十幾廿歲剛讀完書走出嚟就可以應付到，醫生每一日都可能面對死人，面對死者家人，更有可能面對群眾，手上操縱或製成嘅，並非一件貨品，而係人命，好多剛廿歲出頭都未能去真真正正感受「死」呢個層次，要佢救人真係要諗諗。我都唔係無諗過呢個問題，我一開始就有諗有邊兩科係唔適合提早入學，一科係法律，另一科就係醫啦。我第一日收到消息，未睇報紙時已經諗「妹妹仔，你唔會諗住讀醫掛？」，真係點知，佢咁有大志，咁仁心仁術，學陶生話咁講「醫係一門哲學，而唔係技術」，哲學確實係無神童，而且細細個都未能完全理解，就算你IQ200，都唔代表你會學懂，就算你再努力參悟，未到你嘅層次就係未到！

真係我都好建議，妹妹仔，你先進修其他野罷啦，讀醫大個先去實行啦，如果你真係咁有理想，你都唔想呢個理想比你一手摧毀掛？我唔希望多年後於頭版見到你，但標題卻令人羞恥！

2R與1R

前日與朋友去HMV專程試聽這幾天的新碟，而我本是為左買薩頂頂那張CD(最後無買，等糧餉發滿時)，就剛到步，朋友A已於店門前呆左，不過同行幾位同我都無理佢，繼續行去搵我地要嘅碟，就無耐，朋友A以9秒9速度跑黎大聲叫「喂，Race呀！」果一刻我無咩反應，仲諗緊咩野Race，之後佢見我無反應，講左句「有女呀，Cashier，2R果個呀！」，
聽完後我終於覺醒，要佢咁講我先記起呢個失蹤人口，咁我即刻拿拿臨跑去望兩望啦。行到去我都要搵一搵，之後先見到一個細細粒嘅女仔，唔多顯眼，無點化妝，不過都認得出佢係Race嘅，望左幾眼就無再繼續望，亦唔多人發現佢。但我相信，佢感覺到有眼神一直痴實佢，啤到行一行，佢走時都拎轉望一望，就呢一秒我先見到佢正面。佢個樣同上鏡分別唔大，雖然淡妝，但佢真係幾五官標緻，眼大大，長直髮咁，一貫男人夢寐以求嘅形象，再望埋佢個身形，真係應該係男人都會好滿意，甚至覺得擁有佢算係一種奢侈，當我腦海未能完全形容佢時，就目送左佢離開。

其實由2R出道時，就知道大部份人特別鍾意細妹，但我比較奇怪，我鍾意嘅類型同佢家姐比較吻合，細妹對我嚟講只係幾靚咁，無咩特別，就算經過多年後見到真人，我仍然覺得Race好普通，當身邊朋友讚不絕口時，我都唔敢出聲講咩，費事掃興啦，大家知啦，呢D野好主觀，純粹成班麻甩仔昅下女，我無謂下下持不同意見啦，況且Race佢索係事實，只係我眼光比較奇怪啫。

沙

一盤散沙，去形容沒有團結心的一群人或種族，但我看的沙總是一大遍，很難想像沙是怎去散或什麼是散。但要感受沒有團結心，總比去想像散沙容易。

沙是死物，無機心亦無生命，跟團結扯上關係的只是那零碎的外觀或情形。如果一群人可以碎得像沙一樣真是有夠恐佈，一粒又一粒沙，數之不盡，要碎成這樣已不止於人與人之間的分裂，可能同一個人的身心已分裂出來，想與做是兩碼子事，腦與身體亦猶如分割了去別的身體一樣。沙是輕的，風能吹起水能淹，由石變成沙的一刻，它們已是千變萬化的一個，但眼看不見的變化經過，似變非變，變了什麼也不知道，變到什麼地方也不知道，結果總是令人感傷，回想起原本的一個變化成陌生的一樣。

很懷念的一個，還是一盤？我看的是一遍，那我是懷念這遍沙嗎．．．回不去，怎懷念我亦已隨風飄揚。

零捌貳肆

小弟又活多一年，先感謝各界親朋好友的祝賀，包括幫我慶生的各位同事及朋友，小弟先行謝過，感激各位抽出可能幾分鐘數百萬上落的時間，抽出數小時來給我這卑微生命體慶祝，昨晚的sms，我確實收到啦，又再次感謝，而送出兩個可口蛋糕的好同事，亦在此特別鳴謝，那一刻我確實感到一絲絲暖意。

我今年確實已經忘記自己生日，當朋友提醒時，我還要思考一會去確認，得知真確後，我亦無打算去做任何慶祝活動，但最後我還是無恥地接受了這份厚禮，我確實不知如何報答各位的厚愛。今年品嚐蛋糕，吹蠟燭前，我沒有許下任何願望，當別人問及願望時，我亦老實回答「我沒有願望。」，其實並非自己已進入化境，無欲無求，只是我的願望並非只有一個，那我就無謂貪心，心願等等一切還是隨緣好了，而且要眾願望或某些願望成真，確實難事，已經不是理想心願的那淺白層面，而是夢想或想像。

最後，我只想感謝各位，亦感謝這世界這身體又讓我多活一年。其實往後生日，大家無必要花費為我慶祝了，一句短短問候，小弟已滿足。

P.S.我這數天突然想起曾經看過一套電視劇，對話是「生日唔快樂，又講咩生日快樂」。當然我唔係唔快樂，只係突然想起這句贈慶說話，我亦明白眾人期望我快樂，就當是為我許下心願。

美食節巡遊

其實小弟我都係第二次去美食節，不過今年就靠工作關係入去，唔駛排隊唔駛迫唔駛錢，如果唔咪又要中會展嘅迷宮詭計。

去美食節，大家都係為左買平野試下新野，但我就無乜目的，可能都係去感受下，睇下眾生相，有野要就買，都唔會諗住掃貨咁掃。不過唔知係咪仍然唔習慣去迫嘅地方，行極都唔多聚財咁款，無咩心機去睇野，莫講話去排隊試食，單單望見條人龍，就想逐個去訪問下佢地係咪未食飯，點解排完又排，食完又食？雖然無目標，但即食物品應該最吸引我，主要係麵食之類，睇下有無新款，有無咩特別平，所以最後都只係買左些少迷你版出前一丁，可惜我應該唔會點食，主要原因係無原味，竟然唔出最經典嘅麻油原味！其他野最吸引可能就係檻欖油，可能自己越大越健康嘅關係，同埋有時煮西餐無咩理由仲用植物油，食出陣味都怪怪地，而且真係比外面平唔少，但當我想比錢時，我先發覺無點帶錢，我真係！＃＠！＄）＄！

買唔到野，更無咩心機想行，唯有兜多幾個轉，行左個零鐘就走人。過多幾日，又到電腦節，到時又去走兩轉，又去望下d相機佬不停影女，而我，就去望下d相機佬點去高抄低抄啦，你影人，人影你，呢個角度特別好笑。

再見老友

今日發生左一件悲劇，多年嚟無遺失物品嘅我，今日竟然唔見左個袋，仲要連埋部MP3機。好老實，我自己算係小心嘅人，就算錢我都會分開擺，避免真係跌左銀包，都叫有人錢返屋企，所以，可以話只係無左MP3機叫萬幸。

雖則係咁，部機都跟左我一段時間，我真係好珍惜佢，部機仲係好似新一樣，入面有400首我入得辛辛苦苦嘅愛歌，每日出門我都會聽住佢，返屋企又聽住佢，自己無野做時又聽住佢，算係一種依賴。我可以話係一日無歌聽住會發羊吊，甚至想死，MP3機入面嘅歌就係我嘅精神食糧。但我真係對你唔住，愛機，係我唔小心賴低左你，係我唔小心，令你失去主人。我真係好掛住你把聲，好掛住你，我真係無左你會日日發呆，會記起你身上嘅質感，希望你原諒我，更希望執到你嘅人會愛你嘅聲音，會連同個袋好好對待你地，你主人無用，只求你地無穿無爛，我會從遠處好好祝福未知何處嘅你。

再見了，我的老友
主人Zyrix

10 0 0戰術

香港傳統已經唔多，但係有樣幾特別嘅傳統，係無咩人留意！有唔少香港人喺同幾位朋友同行時，都好鍾意擺出一字型排陣，總之條路真係佢買左，你叫聲唔該借借都會啤你兩野，不過我唔鍾意叫佢什麼一字長蛇陣，我鍾意用足球戰術10 0 0去稱呼呢一種自私行為。

雖則我係鍾意慢活，有時都會慢慢行，如果我手上拿住地圖，你可能覺得我係一個遠道而來嘅遊客，但都總有時候會爆發香港人特有小宇宙，快速競步，趕頭趕命去我嘅終點，呢類情形不外乎出現於工作時或約人遲到時，有時更會加入閃避元素，左閃右閃，以似跑非跑似行非行嘅速度過關斬將，務求扭過所有防守球員，但有時就會遇著打卑劣10 0 0戰術嘅球隊，有如擺架巴士喺龍門口，呢種時候只可開口攻擊求讓一路，但呢10條阿茂有時就會做埋球證，舉個紅牌啤一啤你，再趕你出埸。呢D時候只可認輸，唯有等球賽結束。

當然都會有發生球場暴力事件，你真係唔讓呀嘛，我就只好撞，衝過後仲要擰轉望望班球員，以「你奈得我何咩？」嘅眼神望一望以回贈佢地比嘅紅牌！如非趕頭趕命，我都會唔會出超技術，呢類人已經夠卑鄙，我唔想做D有失身份嘅行為，雖然佢地一世都唔知我係乜水，但我自問人格高尚，只求另有高人一破其鋼門。

海的味道(下)

其實海鮮中除左蠔呢樣極品外，好食嘅海鮮種類仲有好多，不過唔提啦，要講都有排講，有機會講日本菜會先講講魚類刺生。但蠔以外嘅最愛都係有嘅，佢就係法國玫瑰蟹，外間俗稱為訓覺蟹。呢類蟹係因為佢地懶，唔多郁動，所以先有呢個名，亦因為如此，佢地體內藏有大量蟹膏，甚至比大閘蟹的膏更多，而佢地嘅膏係有分紅色同白色，點解會咁？我就無詳細問過啦，但兩種我都食過，食法都係以凍食，我係比較偏好白膏嘅。

如果要形容佢地嘅白膏，只可以用棉花糖去形容，入口即溶而且香口，帶有好淡淡蟹香，配上白醋就更能帶出呢種膏香，不過白膏比紅膏「流」，一個人食一隻都足夠（我已經好大食）。而紅膏除左無咁「流」外，膏身亦比較硬，有些少似膏蟹果種，不過味道比白膏或膏蟹更濃，頰齒留香。不論紅白嘅訓覺蟹蟹身都同樣好肉，而且唔拈蟹殼，要食時只需配少量工具即可（因為殼比較硬，亦唔好諗住用牙咬咁樣衰，自己踎屋企食就隨你啦，不過真係好難咬），就算唔點醋都好甜，海水味唔係濃，但一定啖啖肉，食到蟹腳都仲有得你食，食後一定會好滿足，好適合一眾蟹痴。

價錢方面未算好貴，2,3百蚊一隻，一隻大約1kg左右，不過以佢大小及蟹膏份量嚟講係叫抵食，當然要適可而止，因為我相信佢膽固醇唔低，無謂為食食到咁唔健康啦。

海的味道(上)

如果生活中，性係佔第二位，咁對我黎講食一定係第一位，由細就好識得去體會何謂食色性也，我雖然咩都食，總之但凡係食物，都可能會放入口，如果有人同我講泥係好好食，而且當場表面如何進食，及後再寫一篇食泥論文及短評的話，我可能會去親身感受下泥究竟有咩咁好食？不過我天生才能中，味覺算係唔錯嘅一項，應該係聽力以外最好，簡單講可以話係嘴刁，差在我未訓練到完全知佢用咩料煮同點煮，我諗要我廚藝再好些少時先可以好似食家咁準確。

曾經有段時間同一位好友經常到處品嚐各種美食，如果你問我最鍾意食咩菜，我一定答日本菜，如果種類放大少少，其實係我最愛食海鮮，而海鮮中，應該最鍾意係食生蠔，呢種海鮮應該係最能夠表現海嘅鮮味，而且唔同品種嘅蠔都可以食出唔同味道或口感，感覺有些少似純天然嘅廚藝，應該話海係個好偉大嘅廚師。自己試過嘅蠔款應該超過20款，最常見嘅Sydney rock,Irish rock,kumamoto,Rocky bay都食過晒，不過最愛嘅蠔款都唔係呢堆，亦唔係蠔王Belon（曾經食過000 belon，係好濃，after taste比紅酒更甚，但我唔係最愛佢），我最鍾意同樣係出自法國，但比較低調嘅Fine de Claire。當初對蠔唔係太熟識，係自己要求要爽口，但唔係好薄身，帶甜嘅蠔，之後店員就介紹左我呢種蠔。一試後，果然照足要求，無令人失望，食得出果種甜味係海水嘅甜，而唔係純海水的鐵味，而且佢唔係完全爽口脆身，都叫有些少肉，當食完後，更有種不遜於belon的after taste，一種甘甘地嘅餘韻留喺口入面，所以每次食完都對呢種味好難捨難離。到後來，法國蠔食得多，就又試下其他蠔，當時覺得應該cucumbery及creamy嘅蠔都各選一隻最愛應該最好，所以又搵人介紹d比較肥美。可能自己算係好彩，唔係試好多種，就揀左岩心水嘅Skookum，Skookum係美國蠔，無法國蠔果種尊貴，換返黎係有些似美國muscle car，一味大件，而且佢嘅creamy真係有些少似雪糕，更有些似啜落舊肥豬肉度，唔鍾意嘅人一定覺得「流」，但我偏偏鍾意佢咁極端地肥味，而且通常蠔係越大越唔甜，但算係中型偏大嘅佢都有意想不到嘅甜，再混雜少少海水味，真係岩晒我口味。(待續)

明年今日

今日咁岩電腦播到「明年今日」，仲記得呢首歌成日比我感覺似舊非舊，似新非新咁。當年經常聽呢首歌，正直當時心情down到極，唔知點解聽完呢首悲情歌竟然心情大好，頓然覺得呢首歌應該係有所隱喻，而我咁岩腦內神經係接近佢所隱喻嘅頻率，所以聽到我high high地，所以好可能只係我聽先會越聽越開心。

到今日又咁巧合聽返呢首歌，發覺自己無左當年果種好似迷迷地升天嘅感覺，反而有些少著重佢個歌名「明年今日」。我算係多諗野，應該話唔諗野我應該會死果種，所以明年今日呢個問題，係每日都會去幻想或構想，可能唔經唔覺我已經諗左唔知幾多次嘅上年諗明年今日嘅今日。雖則如此，但每次我亦又會無窮無盡咁諗，我到明年今日亦會諗返究竟上年今日我係咪諗緊明年今日，而我上年今日究竟係諗左個乜野嘅明年今日。好在我唔會諗後年今日或三年後今日，如果唔咪應該係真真正正永無止境，諗完又諗，諗到頭爆繼續諗，但究竟點解要諗呢？

天下無不散之宴席

突見渣估兄突然休blog，宣佈暫時放其兒子「追渣沽」於不顧，真係有些少down down地，就連我都開始都諗我係咪都應該停一停。

呢個blog寫左只係3個月，但寫blog寫左剛剛兩年，由初初幾行字仔到而家有時長篇大論，再由十日不見到而家兩三日更新一次，算唔算得上係一種倚賴呢？可能近來睇書聽歌都比以前更多，墨水更足，好應該大筆揮兩揮吐下墨水，當係練習下寫作。不過由於一直人流稀少，有時都會有些少頹，甚至無鬥志再寫落去。

以前我好多愁善感（雖然而家唔係差好遠，唔多唔少都仲有寫些少灰色世界的不明文章），基本上上黎係一種發洩，每次見到不平事又好或感到壓力都好，都要黎帶返我嘅面具，重新描繪我嘅虛擬人格，接住寫些少吐苦文。近黎開始唔係墨水唔夠，只係有些攰，好似搵唔到人或事去支持我繼續寫落去，又或者自己真係功夫唔到家啦，無咩值得吸引人。

之前都會去睇返紀錄，睇下有咩人黎，睇下有幾多人黎咁，不過近黎都太隨心啦，索性逃避，幻想自己個blog最少都叫有觀眾。我仲好記得，個blog咩時候最多人黎呢，每每我寫親blogger hack，都近有一百人一日，雖然人係多，不過留言者少，而且寫hack係幫到人，但絕非我所求嘅寫作，一堆script一堆教學代表不到自己，所以近期發現有新野都無再放。

我可能真係會停一停啦，到真係停時再講聲啦。

穹蒼一生

在這人煙稀少的小村莊，到處的燈火十指可數，兩人靠在窗前望著這夜的星空，回想起數十年前在大都市的狹窄夜空，兩人逐串回望，提起手上的盛著紅酒的水晶杯，微微呷著，酒精使二人都滿脥通紅，在這一刻的他們都似變得年輕，帶著紅粉般的笑臉笑談過去往事。在相擁的一刻，兩人終於回復年老，感到大家的身軀也將土掩，再不能像以往那麼激烈的相擁著。下雨了，在屋內繼續望著這個小村莊，剩下的只有他們二人，下著雨的景色令四處變得更稀虛，轉眼由剛才的快樂氣氛換成喪禮前的狂號。

手牽得更緊，怕失去，怕淍零，害怕孤獨，但在命運的轉輪推動下，一切已成定局。望著身邊的最愛迎接這一天是一生人最大願望，似是一生的努力也是為了迎接這一刻的到來。但時間終於到了，等了一生的願望就在眼前，何以不能感到快樂？我會怕死嗎？還是怕失去．．．不敢再望向身邊那位陪伴數十載的最愛，我怕離開，我怕她會寂寞，我不願意和她分享我的願望，為何孤獨的不是我，不要讓我看到你的淚。是我所追求的，為你帶來不幸了嗎？是我最終都不能令你幸福嗎？請不要怪責我，只怪我沒有許下永遠。

再遇見

又再次遇見無名的你，看見你回頭看一看，還以為是你想起來了。

我認識你，無名的是我，又或許任何人在我心目中都是難忘的。

金色的貝多芬

受到交響情人夢的洗腦磁波影響，自己對古典交響樂嘅興趣越黎越濃厚，慢慢由以前嘅淺嘗，變成而家嘅大大啖去享受。故事中，野田惠形容莫札特是粉紅色的，唔多唔少有少許認同，因為聽莫札特嘅作品總會感到浪漫，同粉紅色確實係幾登對，但唔知點解有時我會覺得莫札特係黑色，可能我唔夠浪漫啦。

對我黎講，如果要用顏色去形容眾多位作曲家都可以，而我第一時間諗到嘅，就係金色的貝多芬。佢嘅作品經常出現於身邊，多用於電影、電視配樂、餐廳入面背景音樂等，隨時喺唔知情嘅情況下接觸到。聽開古典樂，都應該會感受到貝多芬作品係異常雄偉，華麗，聽嘅時候想像到四處係金碧輝煌，就算只係無題嘅作品都會感受到背後好似隱藏住一個宏大嘅世界及背景，呢個就係貝多芬比我嘅感覺，而最閃耀的金色正好形容呢種場面。

金色對我黎講係帶幾分俗氣，不過俗氣唔係貝多芬，而係佢嘅音樂就好似不能脫俗，一直存於四方八面，甚至亦有被後世所濫用。金色的俗氣與華麗的金色都是燦爛悅目，當年的貝多芬，有的只是華麗，到了今日，他染上了幾分俗氣的金，那份味道非銅臭味可比，一份用錢買唔到嘅華麗。同時擁有這身份的他正好說明了他的身世，華麗的是他的作品，但他也是過著比凡人更悲劇的人生。

New iMac

千呼萬喚，新iMac終於降臨，於凌晨的Apple發佈會內，Steve親身介紹他這剛出生的兒子。不負眾人之期望，iMac果然更為纖巧了，雖然換成灰色（白色真的比較襯），但無損我對這新品的愛，不論其配件或其內涵都進一步加強！

使用的CPU仍然是Intel C2D，但換了更快的2.8Ghz，而螢幕亦進一步提升到最少的20"或最大的24"。最令我興奮應該是顯示卡了，原以為新iMac有可能投到Nvidia的陣營，但這是多疑的，最終iMac還是選擇了ATI HD2400或2600PRO，在色澤方面應該會比Nvidia更好，缺點只是Nvidia的遊戲顯示對應有確實的優勢。當然最基本的harddisk亦都增磅了，最少也250GB，只能說，Apple，你太狡猾了。而配件方面，就連keyboard也修身了，比以前更簡潔，更薄身。

由spec可見已知道是無可挑剔，唯一欠缺的只是久未露面，而且再三延遲的leopard。不過最後還是那句，可以出白色版嗎？




最後一點是，新iMac即日有售!

色

由憐而生愛，可悲而不可笑。

由愛而生恨，可笑而不可言。

唯憐方有愛，唯愛始有恨，只乃眾生常規，無罪之有。

對與錯，為自然平衡而存，非為理而活，非為情而生。

人豈只黑與白，何以用極端表達情理之事。

吞噬記憶的惡魔

「噫．．．．．噫．．．．．」

房間離玄關大門只有數步，在半睡半醒的情況下，傳來了大門慢慢打開的聲音。四處漆黑一片，只有點點窗外街燈照進房間的光，在微弱的光照射中，我微微打開了房門，從那小小的門縫間探頭望向玄關的方向。玄關旁是一個小鞋櫃，就在鞋櫃旁邊站了一個小孩，他身穿長袍，拿著一本厚厚的書，有點像電影中常見的魔法師。他雖低著頭，但從他前額髮間透出眼睛看著我，望著帶著這眼神的他，我開始感到一陣陣寒意。可能是他看到我的吃驚表情，他終於抬起頭露出一個親切的微笑，似乎是告訴我，他沒有任何惡意。帶著好奇心的自己，慢慢走向他站立的方向，但是，當到達一個可接觸他的範圍時，他就在我眼前消失了。「這個應該是夢。」在我回到睡床時，我是這樣想的，接著慢慢忘記，慢慢一切變得模糊，我又再睡著。

接著的兩天都是假期，這一晚我一直待在家中客廳看我剛租借回來的電影，看到直到疲倦躺在沙發上睡著。可能是因為睡在沙發上的關係，我並不是睡得太熟，間中醒來看著那停止了的電視螢光幕。

「噫．．．．．噫．．．．．」

大門又再傳來那聲音，我立刻醒來，坐在沙發上看著這一幕。門慢慢打開，一個小身影從門後走了出來，當眼睛到了適應黑暗的一刻，我又再看到那個小孩，同樣的一身裝束，但這一次拿的書比前晚看到的更厚，是比兩本字典還要厚的厚度。他又再次帶著微笑看著我，但這一次我不再打算走過去，只是呆呆坐著望著他，就在這互相對望的過程中，他慢慢提起腳步走了過來，雖然沒有了第一次看到的寒意，但對他的舉動，還是有點介意，我開始緩慢地退到沙發的一角。他走到我面前，就在這伸手可及的距離，我終於忍不住開口，但聲音還沒出來時，他又再無聲地消失於我面前。

這些類似場面幾乎每晚都一直出現，由一開始只覺得是夢，到感覺是真實，直到我當作成為一個習慣，當作是一個晚間的不知名約會。我沒有告訴任何人，這個約會是秘密的，只是我跟這個孩子的秘密，每次他到來都沒有任何改變，他一直都穿著那個有點可愛的裝束，可惜大家還是沒有對話，唯一改變的，只是他手上的一本書，雖然每次變厚的程度都不同，但察覺到書只是越來越厚，望著這厚度能想像它的重量，應該是小孩無法單手拿著的重量，但他每次都一定會帶著這厚厚的一本，用他的左手拿著。對這個唯一的改變是我最著緊的，直到某個晚上，我終於去嘗試接觸這本書，但又是在快能接觸的一剎那，書就隨著那小孩一起消失。

「碰．．．．．！」

伏在汽車上的安全氣袋上，意識到自己在這晚遇上車禍了。嘴角盡是血腥味，我開始伸手沿著嘴角的血腥味往上遊走，之後再次看著自己的一對手，已是染滿血紅，看來自己傷得不輕，應該是個要命的意外，看到這樣的自己，我很想離開這鬼地方，我要逃，我還不能死，但是，我累了，不論我怎樣想離開，身體都不容許我這一連串的動作。就在快要昏過去的時候，每個晚上都會出現的小孩在駕駛座旁的車門外出現，他拿著厚厚的書看著滿身是血的我，他的表情沒有感到驚慌，用他像是看盡一切的目光緊盯著我，我很想開口去說話，但聲音已出不來，就在這刻，他拿起手上的書，打開了這本我從沒看過內容的書，書是空白的，但就在看到每個空白頁的時候，都仿似不斷有記憶填到我的腦海中，慢慢回想，回想這短短的一生，很多都是被我遺忘了的時光，種種的人與事，一幕幕真實地再次出現我的眼前。我終於知道這本書是我一生的記憶，只要有我存在過的，都會記在這本書內。我開始累了，似是看了一場不會完結的電影，慢慢聽到遠處傳來，似是搖籃曲的救護車聲，我真的要睡了，請容許我先離開，再見了，我的世界，謝謝你，你這小惡魔。

烽煙四起

以下內容無一真實，請勿確信，亦與任何人物、團體、機構、恐怖份子毫無關連，請勿對號入座，更勿對本文施加恐怖襲擊。而且部份內容涉及不雅、低能玩笑及二級成份，已受到影淫處勒令套入黑膠袋，如看後感到不安或心神不靈，可使用附帶的黑膠袋作嘔吐袋之用。未滿十八歲者請勿閱讀以下內容。

「你好，李太，你想問邊隻股票呢？」

「你好呀，林小姐，張大師，我想問下0694首都機場，我11蚊買入，止賺位喺邊呢？我應唔應該再追呢？」

「咁嘅，11蚊呀，你入個位幾好呀，而家賺緊1蚊有多啦，而且未出業績，佢個勢應該會直到公佈業績為止，不過我一直建議有貨就可以先留起啦，止賺位大概去到13蚊左右，因為13蚊係好大嘅阻力位，到時就先放貨啦，如果其他投資者無貨就唔建議高追啦。」

「咁其實適唔適合長揸呢？」

「嗱，李太，佢唔係咩食息股，而且前景唔係想像中咁明朗，只係08奧運時將近，有助其業務，但並唔係一隻適合長揸嘅股票。」

「咁究竟我可以揸到幾時呢？我想知揸到幾月幾號。」

「．．．．．．李太，你自己睇價位啦，我只可以比意見你，但我唔識得預言嘅，多謝你嘅電話。」

　　　　　　　　
　　　　　　　　　＊　　　＊　　　＊　　　＊　　　＊


「你好，歡迎致電網上淫技術服務熱線，我係Amy，有咩可以幫到你呢？」

「唔好意思，我今日上網後發現我下載唔到野呀，我係咪比你地公司Ban左呢？」

「先生，首先，請問你點稱呼呢？」

「哦，我姓李嘅，但有咩關係呢？係咪我姓李就唔俾下載呢。」

「．．．哦，唔咪，李生，我地想方便稱呼閣下，呢D都係我地服務要求，希望比客人感受到熱誠。咁請問李生係下載D乜呢？」

「um...但而家唔係好方便講喎，我爸爸媽媽喺我側邊。」

「咁我好難幫你喎，你介唔介意先講左你係下載咩呢？」

（細聲）「．．．小澤瑪利亞之衝上含蕭，藤澤Mari之忽然一周同埋唔知乜女個套酒樓痴漢。」

「．．．．．先生．．．（突然電話筒傳來激烈嘈雜背景聲）」

「衰仔，你又想去下載咸片啦，我鎖左個寬頻唔比你BT啦，仲唔去溫書，你係咪唔想升中二呀？你真係．．．（DO...DO...DO...DO...）」

「喂？．．．．李生，李生？」「．．．．．．．．」


　　　　　　　　　＊　　　＊　　　＊　　　＊　　　＊


「你好，李生？你想問邊隻股票呢？」

「林小姐，我好鍾意你講股票架？你把聲又好聽，人又靚。」

「．．．多謝，李生，咁你想問咩股票呢？」

「我打黎想同你傾下計咋，你知我姓李啊，你知唔知我全名係李澤楷呀，不過我無佢咁．．．．」

「唔好意思，電話線路有些少問題，我地接下一位觀眾電話。」


　　　　　　　　　＊　　　＊　　　＊　　　＊　　　＊


「你好，撒瑪利亞防止自殺會。」

「我想死呀。」

「點解呢，先生，你唔好衝動，你打得比我傾，我就係你朋友，有咩你就講啦。」

「我比女飛呀，佢CUT我線呀，之後諗住睇下咸片，又比老豆飛晒我D碟，剷晒我D片，仲唔比我BT呀。」

「．．．先生，你叫咩名，你幾歲呢？」

「我叫李澤楷，今年13歲，我．．．（背景傳來雜聲）」

（衰仔，你又玩電話啦，今次又打去邊呀，人地係叫李澤楷，你又叫李澤楷，點解你咁無用，真係唔打．．．DO....DO....DO....DO.....)

「......」


　　　　　　　　　＊　　　＊　　　＊　　　＊　　　＊


李太：「仲咩今個月電話費咁貴架？」

李生：「UM...一定係個衰仔玩電話啦，等陣先講啦，我講緊電話呀。」

這時，兒子不小心按下了電話上Speakphone的鍵．．．．．．．

「呀，啊．．．．嘉誠．．．你好勁呀，就到啦，就到啦。」

李太：「老公，你講D電話咁特別嘅，唔怪得電話費咁貴啦，你傾飽佢啦，飽晒可以唔駛食飯架啦，不過你自己交電話費呀。」

李生：「老婆．．．唔關我事呀，係個仔打左去我搶嚟聽咋。」

啪．．．啪．．．啪．．．

「呀，唔好打啦，呀．．．．．」

又是一堆嘈雜聲．．．．．．．

Cosi Fan Tutte

我並非覺得女人的貞潔不可信，只是誘惑當前，任誰都無法抵抗，在這所說的，包括了男人。在18世紀，貞潔可能仍是女人堅守的防線，不論婚前或婚後的女人，都不想掛上不忠的罪名。但到了今時今日，那有人會介意這幼稚老舊的思想，面對著鮮甜的蛇果，你還會去想手上的那個放舊了的是否鮮甜嗎？任誰都會去迎接這個可能比現在手上更甜的蛇果吧，就算那個是一個古老的禁忌。

經過歷史的洗磨，很多所謂的傳統都成為了歌劇，變成了童話故事，用誇張的手法去表現這種現實不能再呈現的城市故事。對比起任何更荒唐的腐敗風氣，不忠算不上什麼，反正只是人生中的一個起伏位，或許就是這種刺激的探險心態，才會勾起更多人的興趣，去追求這種思想落伍的污點。要享受的，就是偷的一剎那，心裡雖存著矛盾，覺得這是落伍思想，但又會介意這傳統所講的貞潔，在矛盾背後，最終還是先做了再算，反正要享受的是偷回來的結果（可能是過程），只要是比現在更刺激的誘惑，才不會去想背後會否有任何陰謀。

莫札特當時所創作的女人皆如此(Cosi Fan Tutte)有違當年道德風氣，但配合21世紀的現在，這變成了一種喜劇諷刺，突然覺得他創作時是有預謀的，似乎他感覺到往後的世道確實如此。有違「預言」的是，他所作的名叫女人皆如此，但到了現在，是變成了男女皆如此。