戀愛寫真

我又係專登唔用「籍著寫真說愛你」呢個名，港版個名比我感覺實在太爛，改名嘅人唔好咁懶好嗎？下下都用呢類名，初初上時我真係唔知就係原著「戀愛寫真」。

尋晚雖然攰，但最後都選擇左去睇呢套戲，可能近來對攝影幾有興趣，而咁岩就有套提到講攝影嘅片，所以就仆到去睇，另外一個原因不外乎係女，不過唔係同女睇，係為左女主角宮崎葵。雖然攰，但我都睇得好專注，睇完後真係聽埋大塚愛首主題曲先走，不過當我諗點形容套戲時真係無頭緒，到我想寫影評時就R晒頭，可能呢類中庸作品真係唔知點寫好，話晒爛片都可以勁鬧勁嘈，好片就有大把野可以形容，卡拉中間位嘅戲真係唔知點去講好。

整體呢套戲個故事好公式化，只係佢又係用好輕描淡寫手法去拍，同「太陽之歌」有些少似，不過於鏡頭運用比前者更好，雖則我之前已盛讚過「太陽之歌」嘅拍攝手法，但呢套更出色，可能玩鏡都係日本仔強項啦。而戲入面D景亦好靚，雖然呢類景日本四處可見，有河有湖有樹林咁，但係可能身處石屎森林關係，我就覺得呢D景係罕有而且脫俗，入面真係影到好似佢英文戲名一樣「天堂的森林」。

眾角色中，無乜邊個特別出色，係宮崎葵個角色有些少難度，但相信同佢本人有些少相似嘅關係，佢演得駕輕就熟，應該係套戲入面最好嘅一個。而男主角玉木宏，我不嬲覺得佢木口木面，真係得個靚仔，但呢套比佢當時同期電視劇「交響情人夢」叫做演得比較好，最少佢呢套做得自然得多，我真係有些少懷疑佢係唔識演笑片，要佢笑得好開懷可能會攞左佢條命，不過算啦，佢今次算係咁，我對佢無太大要求，甚至我本身對呢套要求唔係太多，只係有種一定要睇嘅衝動，我都唔知係為攝影定為左宮崎葵。

P.S.宮崎葵唔係靚，但我真係幾鍾意佢呢類女仔，有些少傻傻地咁，眼大大，得得意意，笑起上嚟好甜，好似好乖清純咁，可惜啦，人地嫁人，我地無緣啦，葵。