再見老友

今日發生左一件悲劇，多年嚟無遺失物品嘅我，今日竟然唔見左個袋，仲要連埋部MP3機。好老實，我自己算係小心嘅人，就算錢我都會分開擺，避免真係跌左銀包，都叫有人錢返屋企，所以，可以話只係無左MP3機叫萬幸。

雖則係咁，部機都跟左我一段時間，我真係好珍惜佢，部機仲係好似新一樣，入面有400首我入得辛辛苦苦嘅愛歌，每日出門我都會聽住佢，返屋企又聽住佢，自己無野做時又聽住佢，算係一種依賴。我可以話係一日無歌聽住會發羊吊，甚至想死，MP3機入面嘅歌就係我嘅精神食糧。但我真係對你唔住，愛機，係我唔小心賴低左你，係我唔小心，令你失去主人。我真係好掛住你把聲，好掛住你，我真係無左你會日日發呆，會記起你身上嘅質感，希望你原諒我，更希望執到你嘅人會愛你嘅聲音，會連同個袋好好對待你地，你主人無用，只求你地無穿無爛，我會從遠處好好祝福未知何處嘅你。

再見了，我的老友
主人Zyrix

10 0 0戰術

香港傳統已經唔多，但係有樣幾特別嘅傳統，係無咩人留意！有唔少香港人喺同幾位朋友同行時，都好鍾意擺出一字型排陣，總之條路真係佢買左，你叫聲唔該借借都會啤你兩野，不過我唔鍾意叫佢什麼一字長蛇陣，我鍾意用足球戰術10 0 0去稱呼呢一種自私行為。

雖則我係鍾意慢活，有時都會慢慢行，如果我手上拿住地圖，你可能覺得我係一個遠道而來嘅遊客，但都總有時候會爆發香港人特有小宇宙，快速競步，趕頭趕命去我嘅終點，呢類情形不外乎出現於工作時或約人遲到時，有時更會加入閃避元素，左閃右閃，以似跑非跑似行非行嘅速度過關斬將，務求扭過所有防守球員，但有時就會遇著打卑劣10 0 0戰術嘅球隊，有如擺架巴士喺龍門口，呢種時候只可開口攻擊求讓一路，但呢10條阿茂有時就會做埋球證，舉個紅牌啤一啤你，再趕你出埸。呢D時候只可認輸，唯有等球賽結束。

當然都會有發生球場暴力事件，你真係唔讓呀嘛，我就只好撞，衝過後仲要擰轉望望班球員，以「你奈得我何咩？」嘅眼神望一望以回贈佢地比嘅紅牌！如非趕頭趕命，我都會唔會出超技術，呢類人已經夠卑鄙，我唔想做D有失身份嘅行為，雖然佢地一世都唔知我係乜水，但我自問人格高尚，只求另有高人一破其鋼門。

海的味道(下)

其實海鮮中除左蠔呢樣極品外，好食嘅海鮮種類仲有好多，不過唔提啦，要講都有排講，有機會講日本菜會先講講魚類刺生。但蠔以外嘅最愛都係有嘅，佢就係法國玫瑰蟹，外間俗稱為訓覺蟹。呢類蟹係因為佢地懶，唔多郁動，所以先有呢個名，亦因為如此，佢地體內藏有大量蟹膏，甚至比大閘蟹的膏更多，而佢地嘅膏係有分紅色同白色，點解會咁？我就無詳細問過啦，但兩種我都食過，食法都係以凍食，我係比較偏好白膏嘅。

如果要形容佢地嘅白膏，只可以用棉花糖去形容，入口即溶而且香口，帶有好淡淡蟹香，配上白醋就更能帶出呢種膏香，不過白膏比紅膏「流」，一個人食一隻都足夠（我已經好大食）。而紅膏除左無咁「流」外，膏身亦比較硬，有些少似膏蟹果種，不過味道比白膏或膏蟹更濃，頰齒留香。不論紅白嘅訓覺蟹蟹身都同樣好肉，而且唔拈蟹殼，要食時只需配少量工具即可（因為殼比較硬，亦唔好諗住用牙咬咁樣衰，自己踎屋企食就隨你啦，不過真係好難咬），就算唔點醋都好甜，海水味唔係濃，但一定啖啖肉，食到蟹腳都仲有得你食，食後一定會好滿足，好適合一眾蟹痴。

價錢方面未算好貴，2,3百蚊一隻，一隻大約1kg左右，不過以佢大小及蟹膏份量嚟講係叫抵食，當然要適可而止，因為我相信佢膽固醇唔低，無謂為食食到咁唔健康啦。

海的味道(上)

如果生活中，性係佔第二位，咁對我黎講食一定係第一位，由細就好識得去體會何謂食色性也，我雖然咩都食，總之但凡係食物，都可能會放入口，如果有人同我講泥係好好食，而且當場表面如何進食，及後再寫一篇食泥論文及短評的話，我可能會去親身感受下泥究竟有咩咁好食？不過我天生才能中，味覺算係唔錯嘅一項，應該係聽力以外最好，簡單講可以話係嘴刁，差在我未訓練到完全知佢用咩料煮同點煮，我諗要我廚藝再好些少時先可以好似食家咁準確。

曾經有段時間同一位好友經常到處品嚐各種美食，如果你問我最鍾意食咩菜，我一定答日本菜，如果種類放大少少，其實係我最愛食海鮮，而海鮮中，應該最鍾意係食生蠔，呢種海鮮應該係最能夠表現海嘅鮮味，而且唔同品種嘅蠔都可以食出唔同味道或口感，感覺有些少似純天然嘅廚藝，應該話海係個好偉大嘅廚師。自己試過嘅蠔款應該超過20款，最常見嘅Sydney rock,Irish rock,kumamoto,Rocky bay都食過晒，不過最愛嘅蠔款都唔係呢堆，亦唔係蠔王Belon（曾經食過000 belon，係好濃，after taste比紅酒更甚，但我唔係最愛佢），我最鍾意同樣係出自法國，但比較低調嘅Fine de Claire。當初對蠔唔係太熟識，係自己要求要爽口，但唔係好薄身，帶甜嘅蠔，之後店員就介紹左我呢種蠔。一試後，果然照足要求，無令人失望，食得出果種甜味係海水嘅甜，而唔係純海水的鐵味，而且佢唔係完全爽口脆身，都叫有些少肉，當食完後，更有種不遜於belon的after taste，一種甘甘地嘅餘韻留喺口入面，所以每次食完都對呢種味好難捨難離。到後來，法國蠔食得多，就又試下其他蠔，當時覺得應該cucumbery及creamy嘅蠔都各選一隻最愛應該最好，所以又搵人介紹d比較肥美。可能自己算係好彩，唔係試好多種，就揀左岩心水嘅Skookum，Skookum係美國蠔，無法國蠔果種尊貴，換返黎係有些似美國muscle car，一味大件，而且佢嘅creamy真係有些少似雪糕，更有些似啜落舊肥豬肉度，唔鍾意嘅人一定覺得「流」，但我偏偏鍾意佢咁極端地肥味，而且通常蠔係越大越唔甜，但算係中型偏大嘅佢都有意想不到嘅甜，再混雜少少海水味，真係岩晒我口味。(待續)

明年今日

今日咁岩電腦播到「明年今日」，仲記得呢首歌成日比我感覺似舊非舊，似新非新咁。當年經常聽呢首歌，正直當時心情down到極，唔知點解聽完呢首悲情歌竟然心情大好，頓然覺得呢首歌應該係有所隱喻，而我咁岩腦內神經係接近佢所隱喻嘅頻率，所以聽到我high high地，所以好可能只係我聽先會越聽越開心。

到今日又咁巧合聽返呢首歌，發覺自己無左當年果種好似迷迷地升天嘅感覺，反而有些少著重佢個歌名「明年今日」。我算係多諗野，應該話唔諗野我應該會死果種，所以明年今日呢個問題，係每日都會去幻想或構想，可能唔經唔覺我已經諗左唔知幾多次嘅上年諗明年今日嘅今日。雖則如此，但每次我亦又會無窮無盡咁諗，我到明年今日亦會諗返究竟上年今日我係咪諗緊明年今日，而我上年今日究竟係諗左個乜野嘅明年今日。好在我唔會諗後年今日或三年後今日，如果唔咪應該係真真正正永無止境，諗完又諗，諗到頭爆繼續諗，但究竟點解要諗呢？

天下無不散之宴席

突見渣估兄突然休blog，宣佈暫時放其兒子「追渣沽」於不顧，真係有些少down down地，就連我都開始都諗我係咪都應該停一停。

呢個blog寫左只係3個月，但寫blog寫左剛剛兩年，由初初幾行字仔到而家有時長篇大論，再由十日不見到而家兩三日更新一次，算唔算得上係一種倚賴呢？可能近來睇書聽歌都比以前更多，墨水更足，好應該大筆揮兩揮吐下墨水，當係練習下寫作。不過由於一直人流稀少，有時都會有些少頹，甚至無鬥志再寫落去。

以前我好多愁善感（雖然而家唔係差好遠，唔多唔少都仲有寫些少灰色世界的不明文章），基本上上黎係一種發洩，每次見到不平事又好或感到壓力都好，都要黎帶返我嘅面具，重新描繪我嘅虛擬人格，接住寫些少吐苦文。近黎開始唔係墨水唔夠，只係有些攰，好似搵唔到人或事去支持我繼續寫落去，又或者自己真係功夫唔到家啦，無咩值得吸引人。

之前都會去睇返紀錄，睇下有咩人黎，睇下有幾多人黎咁，不過近黎都太隨心啦，索性逃避，幻想自己個blog最少都叫有觀眾。我仲好記得，個blog咩時候最多人黎呢，每每我寫親blogger hack，都近有一百人一日，雖然人係多，不過留言者少，而且寫hack係幫到人，但絕非我所求嘅寫作，一堆script一堆教學代表不到自己，所以近期發現有新野都無再放。

我可能真係會停一停啦，到真係停時再講聲啦。

穹蒼一生

在這人煙稀少的小村莊，到處的燈火十指可數，兩人靠在窗前望著這夜的星空，回想起數十年前在大都市的狹窄夜空，兩人逐串回望，提起手上的盛著紅酒的水晶杯，微微呷著，酒精使二人都滿脥通紅，在這一刻的他們都似變得年輕，帶著紅粉般的笑臉笑談過去往事。在相擁的一刻，兩人終於回復年老，感到大家的身軀也將土掩，再不能像以往那麼激烈的相擁著。下雨了，在屋內繼續望著這個小村莊，剩下的只有他們二人，下著雨的景色令四處變得更稀虛，轉眼由剛才的快樂氣氛換成喪禮前的狂號。

手牽得更緊，怕失去，怕淍零，害怕孤獨，但在命運的轉輪推動下，一切已成定局。望著身邊的最愛迎接這一天是一生人最大願望，似是一生的努力也是為了迎接這一刻的到來。但時間終於到了，等了一生的願望就在眼前，何以不能感到快樂？我會怕死嗎？還是怕失去．．．不敢再望向身邊那位陪伴數十載的最愛，我怕離開，我怕她會寂寞，我不願意和她分享我的願望，為何孤獨的不是我，不要讓我看到你的淚。是我所追求的，為你帶來不幸了嗎？是我最終都不能令你幸福嗎？請不要怪責我，只怪我沒有許下永遠。